Elordada az qamtylǵan otbasylarynyń balalaryna kepildendirilgen áleýmettik paket berilip jatyr
«10 naýryzdan bastap Nur-Sultan qalasynda ataýly áleýmettik kómek alatyn otbasylarǵa azyq-túlik taratylyp jatyr. Esterińizde bolsa, Memleket basshysy muqtaj jandardy áleýmettik kómekpen qamtamasyz etýde eńbekke yntalandyrý, ádil ári taza bolýy úshin AÁK-ti taǵaıyndaýdyń tetigin retteýdi tapsyrǵan edi. Áleýmettik jaǵynan az qamtylǵan otbasylarynyń balalaryna kepildendirilgen áleýmettik paket pen AÁK jáne turmysy tómen otbasylarǵa arnalǵan jańa járdemaqyny qosqandaǵy keshendi jańa sharalar 2020 jyldyń 1 qańtarynan bastap júzege asyrylýda. Qazirgi ýaqytta uzyn-sonar kezek boldyrmaý maqsatynda elordalyq jumyspen qamtý jáne áleýmettik qorǵaý basqarmasy kepildendirilgen áleýmettik paketter alýshylardyń tizimin jasady. Áleýmettik paketter aı saıyn keste boıynsha beriledi», - dedi búgin BAQ ókilderine áleýmettik paketterdi otbasylarǵa qalaı berilip jatqanyn kórsetken Nur-Sultan qalalyq jumyspen qamtý áleýmettik qorǵaý basqarmasynyń bólim basshysy Quralaı Januzaqova.
Onyń atap ótýinshe, kepildendirilgen áleýmettik paketter elordanyń 4 aýdanyndaǵy «Magným» JShS saýda jelisiniń 5 sýpermarketinde belgilengen keste boıynsha berilip jatyr. Kestede azamattardyń kepildendirilgen áleýmettik paketterdi qashan jáne qaıdan alýǵa bolatyny jáne azamattardyń sýpermarkettiń qaı fılıalyna bekitilgeni kórsetilgen. Kómek alýshy tizimnen ózin tapqannan keıin ózi bekitilgen Magnum fılıalyna barýy qajet.
«Jalpy, áleýmettik toptamalarmen 4409 balany qamtýdy josparlap otyrmyz. Olardyń ata-analary osy jyldyń qańtar-aqpan aılarynda AÁK alý jóninde ótinish bergen edi. Búgingi kúni kepildendirilgen áleýmettik toptamalarmen 2,6 myń bala qamtyldy. 1-3 jas aralyǵyndaǵy balalar kepildendirilgen áleýmettik toptamasynda 2 dana 400 g suly jarmasy, 1 dana 400 g júgeri jarmasy, 2 dana 160 g gıpoallergendi balalar botqasy, 1 dana 180 g balalar pechenesi, 10 dana 50-100 g balalar jemis jáne kókónis ezbesi, 2 dana 1 l pasterlengen sút bar», - dedi ol.
Bólim basshysynyń dereginshe, 3-6 jas aralyǵyndaǵy balalarǵa 200 g tabıǵı bal (1 dana), 800 g untaqtalǵan burshaq (1 dana), 1000 gr arpa jarmasy (1 dana), 700 gr untaq jarmasy (1 dana), 400 gr suly qaýyzy (2 dana), 800 gr qaraqumyq jarmasy (2 dana), 400 gr makaron (2 dana), 250 gr tańǵy as jastyqshalary (1 dana), 0,8 l kúnbaǵys maıy (1 dana), 200 gr balalar pechenesi (2 dana), 40 gr gematogen (6 dana), 1 l pasterlengen sút beriledi (2 dana).
«1 men 6 jas aralyǵyndaǵy balalarǵa arnalǵan áleýmettik kómekke azyq-túlik pen turmystyq hımııa taýarlary kiredi. Ol toqsanyna bir ret beriledi. Turmystyq hımııa taýarlarynyń jıyntyǵyna balalar tis pastasy (keminde 50 mıllılıtr), balalar tis şetkasy, (keminde bireýi), balalarǵa arnalǵan gıpoallergendi sabyn (keminde 180 gramm), balalar sýsabyny (keminde 200 mıllılıtr), balalar kremi (keminde 45 mıllılıtr), kir sabyn (keminde 200 gramm), balalar kir jýǵysh untaǵy (keminde 800 gramm) kiredi», - dedi Quralaı Januzaqova.
Aıta keteıik, kepildendirilgen áleýmettik paketter beriletin elordada «Magným» saýda jelisi myna meken-jaılardaǵy sýpermarketterinde beriledi: Almaty aýdany, Edil kóshesi, 26, Jansúgirov kóshesi, 8/1 «B» lıteri; Baıqońyr aýdany, Sh. Ýálıhanov kóshesi, 20; Esil aýdany, Turan dańǵyly, 55 «D»; Saryarqa aýdany, Alash tas joly, 23/1.