Elordada aıyppul salynsa da aıylyn jımaıtyn kóńil kóterý oryndary kóp

NUR-SULTAN. QazAqparat - Sońǵy birneshe táýlikte elordadaǵy koronavırýsqa baılanysty ahýal birshama nasharlaı túskeni belgili. Qazirgi ýaqytta qaladaǵy KVI taralýynyń reprodýktıvtilik sany birden asyp jyǵyldy. Buǵan elordalyqtardyń shekteý men karantın talaptaryn durys saqtamaýy sebep ekendigi aıqyn. Jalpy, 13 naýryzdan beri Nur-Sultanda COVID-19-dyń 14 234 jaǵdaıy tirkeldi. 9 aıdyń ishinde aýyrǵan áıelderdiń úlesi artyp, 53 paıyzǵa jetti. Áli de koronavırýs juqtyrýdyń eresekterdiń de, balalardyń da arasynda táýlik saıyn 3-ten 20-ǵa deıin jaǵdaı tirkeledi. Mundaı jaıtta shekteý jáne karantın sharalaryn jeńildetý múmkin emestigi de túsinikti.

Karatındi buzǵandar qansha aıyppul tóleıdi?

Nur-Sultan qalalyq taýarlar men kórsetiletin qyzmetterdiń sapasyn jáne qaýipsizdigin baqylaý departamentiniń basshysy Zeken Ysqaqovtyń aıtýynsha, elordada quramynda ákimdiktiń, sanıtarlyq-epıdemıologııalyq qyzmettiń ókilderi, polıtsııa qyzmetkerleri bar 8 mobıldi top koronavırýs indetiniń órshýi múmkin degen boljamǵa baılanysty saǵat 15.00 men 21.00 jáne 22.00 men tańǵy 04.00 aralyǵynda kúndelikti reıdke shyǵyp, 30-70 nysanǵa monıtorıng júrgizedi. Shekteý jáne karantın sharalaryn buzý anyqtalǵan jaǵdaıda polıtsııa qyzmetkerleri baıanat jazyp, buzýshylyqty foto jáne vıdeo tirkeý júrgizedi. Sodan keıin materıal qaraý jáne ákimshilik shara qabyldaý úshin Taýarlar men kórsetiletin qyzmetterdiń sapasyn jáne qaýipsizdigin baqylaý departamentiniń aýdandyq basqarmalaryna jiberilip otyrady.

«15 qazandaǵy málimetke sáıkes, mobıldi toptar 1 973 nysanǵa mnıtorıng júrgizip, nátıjesinde Taýarlar men kórsetiletin qyzmetterdiń sapasyn jáne qaýipsizdigin baqylaý departamentiniń basqarmalaryna 1 360 baıanat tústi. 634 jeke, laýazymdy jáne zańdy tulǵa 138 mln teńgeden astam somaǵa ákimshilik jaýapkershilikke tartyldy. Ákimshilik jaýapkershilikke tartylǵan tulǵanyń kinási tanylǵan jaǵdaıda oǵan aıyppuldy qysqarǵan tártippen tóleý múmkindigi usynylady. Salynǵan 634 aıyppuldyń 535-i boıynsha 114 mln 891 myń teńge tólendi. Kásipkerlik sýbektisiniń shaǵymymen 4 materıal qaraý úshin ákimshilik sotqa jiberildi», - dedi Zeken Ysqaqov.

Onyń atap ótýinshe, jeke, laýazymdy jáne zańdy tulǵalardyń shekteý jáne karantın sharalaryn buzǵany úshin jaza qoldanylady. QR Ákimshilik quqyq buzýshylyq týraly kodekstiń 425-babyna sáıkes, jeke tulǵalarǵa 30 aılyq eseptik kórsetkish, shaǵyn kásipkerlik nemese kommertsııalyq emes uıym sýbektileriniń laýazymdy tulǵalaryna 230 AEK, orta kásipkerlik sýbektilerine 310 AEK, iri kásipkerlik sýbektilerine 1 600 AEK kóleminde ákimshilik aıyppul salynady.

Al Nur-Sultan qalasy Baıqońyr aýdandyq taýarlar men kórsetiletin qyzmetterdiń sapasy men qaýipsizdigin baqylaý basqarmasy basshysynyń orynbasary Saltanat Yqylasova bıznes, saýda ortalyqtaryndaǵy negizgi shekteý jáne karantın talaptaryn buzý maska taqpaý men áleýmettik araqashyqtyqtyń saqtalmaý bolyp otyrǵandyǵyn aıtady.

«Talap buzýshylyqqa keler bolsaq, nysanǵa kirgende kelýshilerdiń de, sonda jumys isteıtin qyzmetkerlerdiń de dene qyzýy ólshenbeıdi. Áleýmettik ara qashyqtyq saqtalmaıdy. Bir adamǵa 4 sharshy metr jumys orny bolýy tıistigi týraly talap ta oryndalmaıdy. Medıtsınalyq maska taǵý mádenıeti de tómen. Ǵımaratqa kirgen adam kúzetshiniń kózinshe maska taqqanymen, ǵımarat ishinde ony sheship tastaıdy. Oǵan eskertý jasap jatqan eshkim joq. Kóshede júrgende de maskany ıegine túsirip alyp júrgenderdi jıi baıqaıtynymyz jasyryn emes. Mine, osyndaı jaıttar qynjyltady», - dedi Saltanat Yqylasova.

Aıyppulǵa qaramastan kóńil kóterý karantın talabyn buzýdy jalǵastyrýda

Koronavırýs indetiniń órshýine jol bermeý maqsatynda qala boıynsha qabyldanyp jatqan sharalarǵa qaramastan keıbir kásipkerlik sýbektileri aıyl jııar emes. Tipti olardyń keıbiri birneshe márte ákimshilik aıyppul salynǵanyna qaramastan shekteý sharalaryn buzýyn jalǵastyryp otyr. Máselen, Zeken Ysqaqovtyń dereginshe, Jeke batyr kóshesindegi 49 úıde ornalasqan «Tekıla» baryna aýdandyq polıtsııa basqarmasynan 7 baıanat túsip, 4 márte ákimshilik aıyppul tóleýge májbúr bolǵan. Al Saraıshyq kóshesindegi 11A mekenjaıyndaǵy «Lavash fýd» ústinen de 5 baıanat túsip, onyń ekeýi boıynsha aıyppul salý týraly uıǵarym shyǵarylǵan. Baıtursynov kóshesindegi «Mıata» laýndj bary da 2 ret ákimshilik aıyppul tólese de karantın talabyn buzýyn tyımaı otyr. Beıbitshilik kóshesi boıyndaǵy «Arbalet» laýndj baryna tipti 11 ret baıanat jazylyp, 4 ret aıyppul tólegen eken.

«Sonymen qatar Nur-Sultan qalalyq taýarlar men kórsetiletin qyzmetterdiń sapasyn jáne qaýipsizdigin baqylaý departamenti dárilik zattar men medıtsınalyq maskalardyń shekti baǵasyn asyrýǵa da monıtorıng júrgizip otyrady. Osy ýaqytqa deıin zańsyz farmatsevtıkalyq qyzmetpen aınalysqany, dárilik zattardy retsepsiz bosatqany úshin 102 kásipkerlik sýbektisine 13 mln teńgeden astam ákimshilik aıyppul salyndy», - dedi ol.

Nur-Sultan qalalyq polıtsııa departamenti Jergilikti polıtsııa qyzmeti basqarmasynyń bastyǵy Gosman Jakın de keıbir oıyn-saýyq mekemeleriniń sanıtarlyq talaptardy jıi buzatynyn aıtady. Olardyń qatarynda «Alanııa», «Aýra» túngi klýbtary, «Mıata», «Shıshka» laýndj barlary, kompıýterlik klýbtar bar.

«Karantın rejımin saqtaý boıynsha birqatar qosymsha shekteý engizilgeni belgili. Sondyqtan elorda polıtsııasy sanıtarlyq normalardy buzý faktilerin anyqtaý úshin kún saıyn reıdtik sharalar júrgizip otyrady. Erejelerdi buzatyn nysandarǵa, atap aıtqanda, oıyn-saýyq mekemelerine, dámhanalarǵa, karaoke, bar, saýda oryndaryna erekshe nazar aýdarylady. Qabyldanyp jatqan sharalarǵa qaramastan keıbir oıyn-saýyq mekemeleri sanıtarlyq talaptardy buzyp, tyıym salynǵan ýaqytta qyzmet kórsetýlerin jalǵastyrýda», - dedi Gosman Jakın.