Elordada áıgili koreı sýretshisiniń kórmesi ashyldy
Sharany Koreıa Respýblıkasy elshiliginiń Koreı mádenı ortalyǵy men Elbasy Kitaphanasy, Nursultan Nazarbaev qory birge uıymdastyryp otyr.
Kórme aıasynda álemge áıgili koreı sýretshisi Pek Namdjýnnyń murageri dep sanalatyn áıgili koreı medıa óneriniń sheberi Lı Inamnyń jumystary usynylǵan. Avtor bul týyndylary arqyly Shyǵys Azııa klassıkalyq keskindemesiniń áıgili kartınalaryn negizge ala otyryp, Shyǵys jáne Batys óneriniń úılesimin kórsetken.
Kórme Elbasy mýzeıiniń kópfýnktsıonaldy kórme zalynda ótip jatyr, tórt jaǵynan úlken mýltımedııalyq LED-ekrandarmen jabdyqtalǵan.
Avtor tsıfrlyq ónerdiń kómegimen Shyǵys Azııa men Batystyń Kemdje Chongson, Kım Hondo, Jorj-Per Sera, Vınsent Van Gog sııaqty qylqalam sheberleriniń kartınalaryn biriktirý arqyly jańa mazmun ashqan, sondaı-aq tyń stıldegi týyndy arqyly Qazaqstan men Koreıa yntymaǵynyń keleshegin dáripteıdi. 50 mınýttyq týyndy klassıka men zamanaýı keskindemeni bir mýltımedııalyq kontentke toǵystyrǵan.
«Men pandemııaǵa baılanysty ashylý rásimine qatysa almaǵanyma óte ókinemin. Biraq, soǵan qaramastan, Qazaqstanda koreı klassıkalyq keskindemesiniń tanymal kartınalary nasıhattalyp jatqany qýantady. Osy kórmege arnap óz týyndylarymdy «Jaryqtyń jandanýy» taqyrybynda daıyndadym. Sol arqyly Koreıa men Qazaqstan arasyndaǵy ózara qarym-qatynastardyń tarıhı sıpatyna jaryq túsirgim keldi», - dedi kórmeniń ashylýynda tikeleı baılanys arqyly sóz alǵan Lı Inam.
Koreı mádenı ortalyǵy bul sharany Qazaqstan Táýelsizdiginiń 30 jyldyǵy aıasynda qolǵa alyp otyr.
«Bizdiń mádenı ortalyq Qazaqstan Táýelsizdiginiń 30 jyldyǵy qarsańynda qazaqstandyqtarǵa koreı medıa óneriniń týyndylaryn usynǵanyna qýanyshtymyn. Sýretshi eńbekteriniń arqasynda Koreıa týraly kóbirek bilip, ortalyqtyń aldaǵy is-sharalaryna da jurttyń qyzyǵýshylyǵy oıanady dep úmittenemin», - deıdi Koreı mádenı ortalyǵynyń dırektory Lı Heran.
Kórmeniń 12 qyrkúekke deıin jumys isteıdi.