Elordada Áıelder kásipkerligin damytý ortalyǵy ashyldy
Ashylý saltanatyna Nur-Sultan ÓKP Óńirlik keńesiniń tóraǵasy Bolat Omarov jáne «Bastaý Bıznes» jobasynyń túlekteri qatysty. Shara barysynda bastaýlyqtar óz ónimderiniń shaǵyn kórmesin uıymdastyrdy.
Aıta keter bolsaq, Qazaqstannyń 14 óńirinde Ulttyq ekonomıka mınıstrliginiń «Yntymaqtastyq qory», QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa jáne «Atameken» UKP seriktestigi aıasynda 14 áıelder kásipkerligin damytý ortalyǵy ashyldy.
Bastama Azııa Damý Bankiniń qarajaty esebinen qarjylandyrylady jáne ony Qazaqstandaǵy BUU Damý baǵdarlamasy júzege asyrady.
Mundaı ortalyqtardy qurý Qazaqstan Respýblıkasynyń otbasylyq jáne genderlik saıasat tujyrymdamasyna negizdelgen.
Áıelder kásipkerligin damytý ortalyǵy – áıelderdi qarjylaı emes qoldaý alańyna aınalýǵa tıis, onda olar startaptardy iske qosý, jumys istep turǵan bıznesti odan ári keńeıtý jáne damytý úshin birqatar qyzmetter ala alady, sondaı-aq oqytý baǵdarlamalary men netvorkıng-is-sharalarǵa qatysa alady.
«Kásipkerler palatasy janynan Kásipkerlerge qyzmet kórsetý ortalyǵy jumys isteıtini barshańyzǵa belgili. Onda bıznesti júrgizýge qajetti servıstik qoldaýdy alýǵa bolady. 2021 jyldyń qorytyndysy boıynsha ortalyq mamandary 9500-den astam adamǵa, onyń ishinde 5847 áıelge qyzmet kórsetti. Bul shamamen jalpy kóleminiń 60%-yn quraıdy. Osy jyldyń 2 aıynda 1270 kásipker keńes aldy, olardyń 50%-dan astamy áıelder, ıaǵnı shamamen 800 adam. Osylaısha biz áıelderdiń kásipkerlikte belsendi ekenin kórip otyrmyz. Áıelderdi qoldaý ortalyǵy osy jyl ishinde qyzmet kórsetýden basqa, qyz-kelinshekterge qajetti qoldaý sharalaryn odan ári pysyqtaý úshin áıelder kásipkerligin damytý salasyndaǵy qajettilikti taldaý, sondaı-aq áıelder bıznesin damytýǵa kedergi keltiretin problemalardy anyqtaýmen aınalysatynyn habarlaýǵa qýanyshtymyz», – dep atap ótti Nur-Sultan qalasy kásipkerler palatasy dırektorynyń m.a. Beısen Jolboldıev.
Óńirlik palata basshysy qazirgi kezde astanada jumys istep turǵan 163 myń kásipkerlik qyzmet sýbektiniń 47%-yn nemese 77 myńnan astamyn áıelder basqaratynyn aıtty.