Elordada avtobýs parkteriniń 3 laýazymdy tulǵasy jazalandy

NUR-SULTAN. QazAqparat – Elordada «Avtobýs» jedel aldyn alý sharasynyń bir kúni ishinde avtoparkterdiń 3 laýazymdy tulǵasy jaýapkershilikke tartyldy, dep habarlaıdy QazAqparat tilshisi.

Joldaǵy qaýipsizdikti kúsheıtip, avtobýs júrgizýshileriniń kóliktik tártibin qataıtý úshin elordada osy jyldyń 10-17 qazany aralyǵynda «Avtobýs» jedel aldyn alý sharasy ótkizilýde. Shara aıasynda patrýldik polıtseıler men kóliktik baqylaý ınspektorlarynyń jedel toby qurylyp, bir kúnniń ishinde qoǵamdyq kólik júrgizýshileriniń 100-den astam zańbuzýshylyq jasaǵany anyqtaldy.

«Atap aıtqanda, kólik quralyn júrgizip kele jatyp, telefonmen sóılesýdiń 24 jaǵdaıy, aýaǵa lastaýshy zattardyń mólsherin arttyra taratýdyń 11 jaǵdaıy, burylys erejelerin saqtamaýdyń 15 jaǵdaıy, tyıym salynǵan kólik quralyn paıdalanýdyń 6 jaǵdaıy tirkeldi», - dep habarlaıdy qalalyq Polıtsııa departamentinen.

Sonymen qatar jolaýshylardy, bagajdar men júkterdi tasymaldaýdyń erejeleri, eńbek jáne demalys rejiminiń buzylǵany anyqtaldy. Sondaı-aq tıisti ruqsatsyz, tehnıkalyq tekserýsiz qurylǵyny qaıta jasaý jaǵdaılary kezdesken.

«Budan bólek, tehnıkalyq aqaýy jáne paıdalaný erejeleriniń basqa da buzýshylyqtary bar kólik quraldaryn jolǵa shyǵarǵany úshin avtobýs parkteriniń 3 laýazymdy qyzmetkeri ákimshilik jaýapkershilikke tartyldy», - delingen málimette.