Elordada aýyr sybaılas jemqorlyq qylmys týraly habarlaǵan 3 adamǵa syıaqy berildi

NUR-SULTAN. QazAqparat – Bıylǵy jyldyń 5 aıynda aýyr túrdegi sybaılas jemqorlyq qylmysy týraly habarlaǵan 3 elorda turǵynyna 612 570 teńge kóleminde syıaqy berildi. Bul týraly QR Sybaılas jemqorlyqqa qarsy is-qımyl agenttiginiń elordalyq departamentindegi preventsııa jáne parasattylyq basqarmasynyń basshysy Marat Haırýllın málim etti, dep habarlaıdy QazAqparat tilshisi.

«Nur-Sultan qalasynda sybaılas jemqorlyq oryn alatyny jáne oryn alǵany týraly habarlaǵany úshin 2019 jyly jalpy somasy 1 mln 590 750 teńgege 9 azamat yntalandyryldy. Ótken jyly 4 tulǵa jalpy somasy 627 820 teńgeniń syıaqysy tabys etildi. Al bıylǵy jyldyń 5 aıynda bizdiń departament 612 570 teńge somasyna 3 adamdy syıaqymen marapattady. Olardyń úsheýi de aýyr sybaılas jemqorlyq qylmystyq is týraly habarlady», - dedi M. Haırýllın atalǵan vedomstvoda onlaın ótken baspasóz máslıhatynda.

Sonymen qatar, basqarma basshysy sybaılas jemqorlyq faktisi týraly habarlaǵan adamdardy qorǵaý tıisti túrde júzege asyrylatynyn jetkizdi.

«Sybaılas jemqorlyqqa qarsy is-qımyl týraly» QR Zańyna sáıkes mundaı jaǵdaılar týraly habarlaǵan adam aqshalaı qarajatpen yntalandyrylyp qana qoımaı, memlekettiń qorǵaýynda bolady. Mundaı adam týraly aqparat memlekettik qupııa bolyp tabylady», - deıdi ol.

Sóz sońynda, Antikor ortalyǵy-nyń ókili sybaılas jemqorlyq faktilerimen kezdesken jaǵdaıda, 1424 nómirli Call-ortalyǵyna, sondaı-aq Nur-Sultan qalasy boıynsha sybaılas jemqorlyqqa qarsy qyzmettiń kezekshi bólimine 8 [phone], 72-66-32 qońyraý shalýǵa bolatyndyǵyn aıtyp ótti.

Buǵan deıin elimizde para alý men berý týraly habar jetkizgen azamattarǵa beriletin syıaqy kóleminiń artqany týraly habarlaǵan bolatynbyz.