Elordada aýlalardy abattandyrý jumystary júrgizilip jatyr

NUR –SULTAN. QazAqparat -Elordada «Jumyspen qamtýdyń jol kartasy» baǵdarlamasy aıasynda aýlalar men úıishilik aýmaqtardy abattandyrý jumystary júrgizilip jatyr. Bıyl qalanyń barlyq aýdandary qamtylyp, 150-ge jýyq aýla abattandyrylady, dep habarlaıdy qala ákimdiginiń resmı saıty.

Qala ákimi Altaı Kólginov birqatar aýlalardy aralap, qala turǵyndarymen kezdesti. «Aýlany jóndep ne abattandyrǵan kezdi sońǵy ret qashan kórgenimiz esimizde joq. Balalar oınaı almaıdy, barlyq trenajerler eski. Endi bizdiń aýlamyzda jańa balalar alańy bolady. Munda balalar fýtbol oınap, trenajerlarda sportmen shuǵyldana alady», - dep atap ótti Otyrar kóshesi, 3 (Baıqońyr aýdany) turǵyndary.

Sondaı-aq, Altaı Kólginov Kravtsov, 6, Taha Hýseın 15a,15/3,15/4, Bókeıhan, 6 jáne t. b. mekenjaılardaǵy alańdarda júrgizilip jatqan jumystardyń barysymen tanysty. «Aýlalardy durystap abattandyrý qajet. Munda balalar oınap, barlyq otbasy músheleri demalady. Balalardyń jasy ártúrli bolǵandyqtan, aýlalardy abattandyrý kezinde ony eskerý qajet. Oryndyqtar ornatyp, kógaldandyrýǵa erekshe kóńil bólý kerek. Aǵashtar men butalardy kóbirek otyrǵyzý qajet», - dedi ol.

Bıyl 150 aýla jáne aýla aýmaqtary abattandyrylady. Bul degenimiz 150 myńnan astam turǵyny bar 250-den astam kóp páterli turǵyn úı kesheni. Byltyr 150 oıyn alańy abattandyryldy. «Jumyspen qamtýdyń jol kartasy» baǵdarlamasy aıasynda 15 myń jumys orny ashylady. Turǵyndar birinshi kezekte jumyspen qamtý ortalyqtary arqyly jumysqa ornalasa alady.