Elordada «Aýǵanstan tarıhy» kitabynyń tanystyrylymy ótti
«Aýǵanstan tarıhy» kitabynyń avtory – qazaqstandyq saıasattanýshy, shyǵystanýshy ǵalym, Aýǵanstan boıynsha maman Sultan Álimbekov. Bul týyndy 2015 jyly jaryq kórgen «Istorııa Afganıstana» atty monografııanyń memlekettik tildegi qaıta basylymy. Shyǵarmany qazaq tiline aýdarý jáne shyǵarý QR Prezıdenti janyndaǵy QSZI memlekettik tilde kitaptar shyǵarý jobasy aıasynda júzege asyrylǵan.
«Bul bizdiń qyzmettegi mańyzdy baǵyt. Biz qazaq tiline tanymal avtorlardyń týyndylaryn aýdaramyz. Mundaı bastama Murat Laýmýlınniń monografııasyn aýdarýdan bastalǵan edi. Endi Sultan Álimbekovtiń úlken eńbegin aýdardyq. Búgin tusaýy kesilip otyrǵan kitapta avtorǵa Aýǵanstan premer-mınıstriniń alǵys haty qosyldy. Ol bul eńbekti joǵary baǵalady», - deıdi QR Prezıdenti janyndaǵy QSZI dırektory Zarema Sháýkenova.
Onyń aıtýynsha, «Aýǵanstan tarıhy» kitaby osy eldiń tarıhyna arnalǵan, onda Úndistan, Iran jáne Ortalyq Azııa arasyndaǵy joldardyń qıylysynda ornalasqan osy memleket tarıhynyń negizgi sátteri keshendi túrde qarastyrylady.
«Men kitaptyń qazaq tilinde jaryq kórgenine óte qýanyshtymyn. Keıbir tarıhı sátter postkeńestik keńistikte de, qazirgi ýaqytta da óte ózekti», - deıdi kitap avtory Sultan Álimbekov.
Іs-sharaǵa QR Parlamenti Májilisiniń Halyqaralyq ister, qorǵanys jáne qaýipsizdik komıtetiniń tóraǵasy Muhtar Erman, «AFG-OAZ» Qazaqstan-Aýǵanstan qaýymdastyǵynyń tóraǵasy, QR-diń Aýǵanstandaǵy eks-elshisi Ómirtaı Bitimov, QR SІM Taıaý jáne Orta Shyǵys departamentiniń dırektory Erjan Muqash, «Ǵylym ordasy» bas dırektorynyń mindetin atqarýshy Nurlan Seıdin, L.N.Gýmılev atyndaǵy EUÝ halyqaralyq qatynastar kafedrasynyń meńgerýshisi Dana Ahmedbıanova, QSZI bas ǵylymı qyzmetkeri Murat Laýmýlın qatysty.