Elordada Atyraý jáne Shyǵys Qazaqstan oblystarynyń jármeńkesi ótip jatyr

NUR-SULTAN. QazAqparat - Elordadaǵy «Han shatyr» saýda, oıyn-saýyq ortalyǵynyń janyndaǵy alańda Atyraý jáne Shyǵys Qazaqstan oblystary aýyl sharýashylyǵy ónimderiniń jármeńkesi ótip jatyr, dep habarlaıdy QazAqparat tilshisi.

Jármeńkege Shyǵys Qazaqstan oblysynyń 15 aýdany men eki qalasynan óndirýshiler qatysýda.

ShQO Aýyl sharýashylyǵy basqarmasy basshysynyń orynbasary Erbol Qýanyshevtyń aıtýynsha, shyǵysqazaqstandyq kásipkerler Nur-Sultan qalasyna 310 tonna kóleminde taýar alyp keldi. Jalpy somasy 224,7 mln teńge bolatyn 15-ten astam taýar túri satylady. Atap aıtqanda, 60 tonnadan astam bal, 15 tonna sút ónimi, 13 tonna kúnbaǵys maıy, 3 tonna jarma, 5 tonna balyq, 45 tonna jylqy eti, 10 tonna qymyz jáne ulttyq taǵamdar men pantoónim, 150 tonna kóleminde kókónis satý josparlanǵan.

Al Atyraý oblysynyń 7 aýdany men Atyraý qalasynyń taýar óndirýshileri elordaǵa jalpy somasy 135 mln teńgeniń 176,7 tonna ónimin ákelgen.

Atyraý oblysy aýyl sharýashylyǵy basqarmasynyń basshysy Qaırat Nurlybaevtyń sózine qaraǵanda, óńirden jetkizilgen ónimder naryqtyq qunynan 15-20 paıyz tómen baǵamen satylyp jatyr.

«Jalpy, Atyraý oblysynan jármeńkege 45 tonna balyq ónimi, 25 tonna et ónimi, 36 tonna kókónis, 40 myń jumyrtqa, 6 tonna sút ónimi jáne 65,7 tonna ózge de taýar jetkizildi. Bul ónimderdiń barlyǵy halyqqa qoljetimdi baǵamen satylýda. Osy jármeńkege Nur-Sultan qalasy ákimdiginiń bekitken kestesine sáıkes keldik. Jetkizilgen taýarlardy tıisti deńgeıde ótkizý úshin barlyq jaǵdaı jasalǵanyna bizdiń óńirden kelgen sharýashylyqtar men kásipkerler rızashylyǵyn aıtýda. Jalpy, bizdiń óńirden jetkizilgen ónimge suranys jaqsy ekenin baıqadyq», - dedi Q.Nurlybaev.

Aıta keteıik, elordalyqtarǵa usynylatyn azyq-túlik ónimderiniń barlyǵy sanıtarlyq veterınarlyq talaptarǵa saı keledi, osy oraıda ónimderge tıisti qujattar berilgen.