Elordada ataýly áleýmettik tólemnen otbasylardyń 96% qaǵylǵan

ASTANA. QazAqparat - Astanada ataýly áleýmettik kómek alýy tıis otbasylardyń 96 paıyzy tıesili qarajattarynan qaǵylǵan. Bul týraly búgin qala halqynyń aldynda esep berip jatqan elorda ákimi Baqyt Sultanov aıtty, dep habarlaıdy QazAqparat tilshisi.

«Ózderińiz bilesizder, qala mańyndaǵy eski úıler súrilip jatyr. Olardyń ornyna zamanaýı talapqa saı, kópqabatty, aınalasynda mektep-balabaqshasy, emhana-dárihanasy jáne taǵy da basqa áleýmettik ınfraqurylymy qamtylǵan páterler salynyp jatyr. ıAǵnı, kópbalalaly analardy pátermen ǵana qamtyp qoımaı, búgingi kúnniń keregine saı jaǵdaılarmen qamtamasyz etemiz», - dep atap ótti qala basshysy.

Onyń aıtýynsha, kópbalaly otbasylarǵa arnalǵan ataýly áleýmettik kómek búgingi kúnniń eń ózekti máselesi bolyp otyr. Búginde mundaı 10 myń otbasynyń shamamen 4 paıyzy ǵana esepteý ádistemesiniń erekshelikterine baılanysty ataýly áleýmettik kómek alady.

«Bul óte tómen kórsetkish. Qanshama aqsha bólingenimen, biz osynaý tıesili aqshany olarǵa jetkize almaı otyr. Al, bul, olardyń aqshasy ǵoı. Mundaı jaıt qalaı oryn alǵan? Biz mán-jaıdy tyńǵylyqty zerdelep shyqtyq. 25 myń otbasynyń árbirin qarastyrdyq», - dep atap ótti ol.

Ákimniń aıtýynsha, qazirgi ýaqytta dál osy másele ákimdiktiń basty mindeti bolyp otyr.

«Tirkelgen barlyq otbasy ózderine tıesilini alýy tıis. Al tirkelmegender bizdiń nazarymyzǵa iligýi qajet. Barlyǵy naqty túsinýi úshin - bul Elbasynyń bizge júktegen tapsyrmasy. Áleýmettik qorǵaý - bul №1 basymdyq. Sóz tek qana kópbalaly nemese az qamtylǵan otbasylar jaıynda ǵana emes, múgedekter, zeınetkerler, Ekinshi dúnıejúzilik soǵys ardagerleri jáne ózge de sanattaǵylar týrasynda bolyp otyr», - dedi B.Sultanov.