Elordada «Asyl ana» kópbalaly analardyń baıqaýy ótedi

NUR-SULTAN. QazAqparat - Bas qaladaǵy kópbalaly analar arasynda qolóner sheberliginen baıqaý uıymdastyrylyp, keıin ol kórmege qoıylady, dep habarlaıdy QazAqparat tilshisi.

«Búgin kópbalaly analarǵa arnalǵan tegin qoldanbaly óner men qolóner sheberligin oqytý semınarynyń qatysýshylaryn marapattaý rásimine qatystym. Oqytý semınarlary men sheberlik oqýlarynan sátti ótken analarǵa arnaıy 50 tigin mashınasy syıǵa tartyldy.

Semınardy tanymal etnodızaıner Yrza Tursynzada bastaǵan kásibı mamandar júrgizdi. Jalpy, «Asyl ana» jobasy birneshe kezeńnen turady. Onyń árqaısysy analardyń áleýetin jan-jaqty ashýǵa baǵyttalǵan», - dep jazdy qala ákiminiń orynbasary Erlan Kanalımov Facebook-tegi paraqshasynda.

Onyń aıtýynsha, semınar kezinde kópbalaly analar arnaıy tapsyrmalardy oryndap, bos oryndar jármeńkesine qatysqan.

«6 shilde - qala kúni merekesi qarsańynda «Asyl ana» baıqaýy ótedi. Oǵan sheberlik sabaǵynan ótken kópbalaly analar qatysady. Olar qajetti materıaldarmen, tigin mashınalarymen qamtamasyz etiletin bolady. Baıqaýǵa analar óz qoldarymen jasalǵan buıymdaryn usynady. Bul buıymdardyń barlyǵy arnaıy úlken kórmege qoıylmaq.

Jeńimpazdar dıplomdarmen jáne jobany qoldaǵan metsenattar, demeýshiler taǵaıyndaǵan baǵaly syılyqtarmen marapattalady», - dedi ol.

Sondaı-aq, qala ákimi orynbasarynyń málimdeýinshe, jobanyń sońǵy kezeńinde «Asyl ana» kópbalaly analardy qoldaý ortalyǵyn qurý josparlanyp otyr. Onda analarǵa quqyqtyq, psıhologııalyq, kásibı keńester beriledi. Ortalyqtyń taǵy bir erekshe qyzmeti - analarǵa jumysqa turýǵa kómektesedi.

Odan bólek, analardyń bala kútýine yńǵaıly bolýy úshin shaǵyn balabaqsha uıymdastyrylatyn bolady.