Elordada Astana Smart City atty jańa akseleratsııalyq baǵdarlama iske qosyldy

<p>ASTANA. KAZINFORM &ndash;<strong> </strong>Elorda ákimdigi Astana Hub jáne Astana Innovations-pen birlesip, Astana Smart City akseleratoryn iske qosty.&nbsp;</p>

Qala ákimdiginiń resmı saıtynyń málimetinshe, Astana Smart City densaýlyq saqtaý, sý resýrstaryn basqarý, kógaldandyrý, qaldyqtardy suryptaý, bilim berý, kólik jáne kommýnaldyq qyzmetter sııaqty túrli salany qamtıdy. Baǵdarlamaǵa qatysý úshin álemniń túkpir-túkpirindegi MVP jáne odan joǵary satydaǵy jobalary bıyl 7 shildege deıin ótinim bere alady. 

– Baǵdarlama birneshe negizgi mindetti sheshýdi kózdeıdi. Eń aldymen, startaptarǵa ınnovatsııalyq sheshimderdi naqty qala jaǵdaıynda synap, qadaǵalaýdyń biregeı múmkindigi usynylady. Qala protsesterin ońtaılandyrý úshin jasandy ıntellekt tehnologııalaryn damytýǵa erekshe den qoıylady. Baǵdarlamanyń mańyzdy aspektisi – qala ınfraqurylymy men qyzmetterin jaqsartý úshin ozyq sheshimder usyný, - dep jazylǵan astanahub portalynda. 

Astana Smart City qatysýshylaryna qoldaý kórsetý úshin Astana Hub tehnoparkiniń Seed Money baǵdarlamasy arqyly qarjylandyrý júzege asyrylady. Atap aıtqanda, 10 úzdik jobanyń árqaısysyna 5 mln teńgege deıingi qarajat usynylady. Baǵdarlama Astananyń aqparattyq tehnologııalar ortalyǵy retindegi mártebesin nyǵaıtyp, ázirlengen sheshimderdi syrtqy naryqqa masshtabtaý men eksporttaýǵa múmkindik berip, qalanyń básekege qabilettiligin arttyrady jáne ınnovatsııalyq ekonomıkany damytýǵa yqpal etedi dep kútilýde. 

Qatysýshylardy irikteý barysy onlaın ótinim qabyldaý, bastapqy skrınıng, sarapshylarmen suhbat jáne 20 startap tańdalatyn aqtyq kezeńdi qamtıdy. 

Baǵdarlama 5 tamyzda bastalyp, 3 aı boıy oflaın formatta ótedi. Oqytý sheńberinde qatysýshylar sala mamandarymen baılanys ornatyp, sarapshylarmen toptyq semınarlarǵa qatysyp, jeke konsýltatsııalar ala alady. Sondaı-aq olarǵa jelilik trekerlermen trekshn-kezdesýler jáne ár apta saıyn jetekshi treker keńesi usynylady. Startaptar óz sheshimderin mekemelerde synaqtan ótkizip, osylaısha IT-sheshimderdi jetildirý jáne olardy elorda turǵyndary qajettilikterine qaraı beıimdeý múmkindigine ıe bolady.

Baǵdarlamanyń sheshýshi kezeńinde Demo Day uıymdastyrylady, munda qatysýshylar pılottyq joba nátıjelerin ákimdik ókilderi men ekojúıe sarapshylary nazaryna usynady. Eń utymdy IT-sheshimder ári qaraı qoldanysqa engizý úshin tańdalady. 

Astana Smart City baǵdarlamasy jáne qatysýǵa ótinim berý jónindegi málimetterdi astanahub.com platformasynan tabýǵa bolady.