Elordada áskerı ártister avtobýs jolaýshylaryna án shyrqap berdi
«Keshe №10 avtobýsta erekshe kontserttiń kýágeri boldym. Jobany Uly Jeńis kúnine oraı Qorǵanys mınıstrligi ázirlegen. Áskerı ansambldiń ánshileri án shyrqap qana qoımaı, keıbir jerlerde bı bılep, turǵyndardyń kóńil-kúıin kóterýge tyrysty. Osyndaı áserli ári tosyn shara uıymdastyrǵandaryńyz úshin rahmet»,- dep jazdy Astana qalasynyń turǵyny óziniń Feısbýktegi paraqshasynda.
QR Qorǵanys mınıstrligi aktsııanyń 7 mamyr merekesi qarsańynda QR Qarýly kúshteriniń qurylǵanyna 25 jyl tolýyna jáne 9 mamyr Jeńis merekesine oraı ótkizilgendigin aıtty. Fleshmobty ótkizý úshin jumys ýaqytynyń sońy arnaıy tańdalyp alynǵan.
«Almatyda da dál osyndaı aktsııany uıymdastyrý josparlanýda. Biraq avtobýsta emes, metroda. Oǵan «Kırov» áskerı-patrıottyq klýbynyń balalary tartylatyn bolady», - dep habarlady QR Qorǵanys mınıstrliginiń baspasóz qyzmeti.
Qorǵanys mınıstrliginiń merekelik aktsııalary munymen aıaqtalmaıdy. 7 mamyrda Astana qalasynyń qonaqtary men turǵyndary úshin áskerı sherýden basqa «Han Shatyr» saýda oıyn-saýyq ortalyǵynda Qurmet qaraýyl rotasy qoıan-qoltyq urys tásilderin, sondaı-aq qarýdy qoldanyp jáne qarýsyz urys qımyldaryn kórsetetin bolady.