Elordada alkogolsiz sýsyndardyń 19 paıyzy tehnıkalyq reglamentke saı emes
«Ásirese jazda alkogolsiz sýsyn tutyný mólsheri artady. Solardyń kóbiniń japsyrmasynda sýsyn quramynda shyryndar, emdik shópterdiń syǵyndylary, dárýmender men sergitetin zattar bar ekeni jazylady. Bul sýsyndar bulshyqet belsendiligin ýaqytsha yntalandyryp, serotonın arqyly kóńil-kúıdi kóteredi. Shóldi, tipti qarynnyń ashqanyn qysqa ýaqytqa basady. Tanymal alkogolsiz sýsyndardyń paıdasy osy ǵana. Al olardyń, ásirese energetıkalyq sýsyndardyń naqty zııany bar. Mysaly, únemi qoldaný adam aǵzasynyń patologııasyna, tis emaliniń buzylýyna jáne tez salmaq qosýǵa, qant dıabetine, gıpertonııaǵa, aterosklerozǵa jáne basqa aýrýlarǵa ákelýi múmkin», - deıdi qalalyq sanıtarlyq-epıdemıologııalyq baqylaý departamentiniń bólim basshysy Qarlyǵash Ábdisheva.
Nur-Sultan qalasynyń sanıtarııalyq-epıdemıologııalyq baqylaý departamenti ımporttyq jáne otandyq óndiristen shyqqan alkogolsiz sýsynyń 63 úlgisine, onyń ishinde energetıkalyq sýsynnyń 23 úlgisine saraptama jasapty.
«Zertteý qorytyndysy boıynsha, Eýrazııa ekonomıkalyq odaǵynyń tehnıkalyq reglament talaptaryna 12 ımporttyq sýsyn, onyń ishinde 5 energetıkalyq sýsyn synamasy sáıkes kelmedi», - deıdi maman.
Sanıtarlyq-epıdemıologııalyq baqylaý qyzmetiniń ókili normadan shekten tys aýytqyǵan ónimderdi atady:
- «Monster Ultra Can» energetıkalyq sýsyny», Óndirýshisi: Refresco Manalux B,V, Orange Nassaulaan 44, Nıderland Koroldigi (partııa nómiri: J2129D5, shyǵarylǵan kúni: 10.2021 j., jaramdylyq merzimi: 10.2023 j. deıin),
- «Monstr «Enerdjı Ýltra», alkogolsiz sergitetin gazdalǵan sýsyn. Óndirýshi: Refresko Banalux B. V., Orange Nassaulaan 44, BX, Maarheeze, Nıderland Koroldigi (partııa nómiri: H2101 D5, shyǵarylǵan kúni: 08. 2021 j., jaramdylyq merzimi: 08.2023 j.),
- «Natahtarı» lımonady». Óńdirýshi: «Lomısı» AQ, Grýzııa (partııa nómiri kórsetilmegen, daıyndalǵan kúni: 17.02.2022 j., jaramdylyq merzimi:270 táýlik).
«Bulardyń quramynda natrıı benzoaty kontsentratsııasynyń 1,1-1,2 esege deıin artqany anyqtaldy. Keı adamdarda natrıı benzoaty allergııalyq reaktsııa týdyrady. Natrıı benzoaty men askorbın qyshqylynyń ózara árekettesýinen týyndaǵan benzol qaterli isikterdiń paıda bolýyna sebep bolýy múmkin. Ónim qaýipsizdigine monıtorıng júrgizý aıasynda elordanyń saýda sórelerinde jaramdylyq merzimi ótken sýsyndardy satýǵa jol beriletini belgili boldy. Osyǵan baılanysty, departament mamandary tutynýshylardy alkogolsiz salqyn sýsyndardy tańdaýda muqııat bolýǵa, zattańbadaǵy málimetterdi muqııat zerdeleýge, jaramdylyq merzimine, saqtaý sharttaryna nazar aýdarýǵa shaqyrady», - deıdi departament ókili.
Departamenttiń baspasóz qyzmeti saýda oryndarynda ónim sapasymen baılanysty aqaýlar men zańsyzdyqtar baıqalsa, aýmaqtyq sanıtarııalyq-epıdemıologııalyq baqylaý organdarynajúginý qajettigin aıtyp otyr.
Elorda boıynsha 57-60-56, 57-60-59, telefondaryna jána astana.dooz@gmail.com elektrondy mekenjaıyna, dkkbtu.nur-sultan@dsm.gov.kz saıtyna habarlaýǵa bolady.