Elordada áleýmettik salanyń birqatar nysanyna jylý berildi
11:52, 26 Qyrkúıek 2014
ASTANA. QazAqparat - Elordada áleýmettik salanyń birqatar nysanyna jylý berildi. Bul týraly búgin 2014-2015 jyldary jylý berý maýsymyna daıyndyq qorytyndysyna arnalǵan keńeste Astana qalasynyń ákimi Imanǵalı Tasmaǵambetov málim etti.
«Qazirdiń ózinde Astana qalasynda 29 densaýlyq saqtaý nysanynyń 14-ine jylý berile bastady. Bul 48 paıyzdy quraıdy. 64 balabaqshanyń 51-i, 57 mekteptiń 28-i jylý berý júıesine qosyldy», - dedi qala basshysy.
Onyń sózine qaraǵanda, áleýmettik saladaǵy 170 nysannyń 103-ine jylý berildi. Al dúısenbiden bastap elordanyń barlyq balabaqshalarynda, mektepterinde, densaýlyq saqtaý nysnadarynda jylý beriletin bolady.
Aıta keterligi, qala ákimdigi usynǵan aqparatqa sáıkes, qazirgi ýaqytta ortalyqtan jylytylatyn 2115 kóppáterli turǵyn úıdiń 2086-synda aldaǵy jylý berý maýsymyna daıyndyq jumystary aıaqtalǵan. Almaty aýdany -100 paıyz, Esil aýdany - 93, al Saryarqa aýdany 98,1 paıyz daıyn.