Elordada áleýmettik az qamtylǵan otbasylarǵa azyq-túlik sebeti taratyldy
Arnaıy uıymdastyrylǵan top 50-den asa otbasyǵa azyq-túlik sebetin tapsyrdy.
Áleýmettik az qamtylǵan otbasylar, ıaǵnı tolyq emes, múgedek balalary bar otbasylar, sol sııaqty jalǵyzbasty zeınetkerler qala ákimdiginiń arnaıy tiziminde bar.
«El Táýelsizdiginiń 30 jyldyǵy mereıtoıyna oraı qala ákimdiginiń uıymdastyrýymen jyl basynan beri 30 ıgi is bastamasy júrip jatyr. Onyń aıasynda áleýmettik az qamtylǵan, jaǵdaıy tómen otbasylarǵa azyq-túlik sebetterin jyl basynan beri tapsyryp kelemiz. Ár sebettiń salmaǵy – shamamen 30 keli. Sebettiń ishinde kartop, pııaz, qyryqqabat, un, jumyrtqa, suıyq maı, sút, aıran, shujyq sekildi turmysqa qajetti ónimder bar. Bul jolǵy qaıyrymdylyq sharasyna Aqmola oblysynyń kásipkerleri demeýshilik etip otyr. Igiligi mol shara bıyl bastalyp, jyl sońyna deıin jalǵasady», – deıdi Nur-Sultan qalasy ákiminiń keńesshisi Qýanysh Moldabek.
Volonter Janna Seıdishovanyń aıtýynsha eriktiler toby ylǵı da saýaby mol sharanyń basy-qasynda júredi.
«Búgin «Han Shatyr» SOO janyndaǵy jármeńkede azyq-túlikterdi sebetterge bólip otyrmyz. Ary qaraı jaǵdaıy tómen otbasylarǵa taratamyz. Arnaıy tobymyz bar», – dep volonter Janna Seıdishova jaýabyn qysqa qaıyrdy.
«Qala ákimdigine ótinish aıtyp barsam nazarynan tys qaldyrmaıdy. Únemi kómektesip turady. Jaqynda baspanaly boldyq. Buryn jer úıde bir bólmeni jaldap turatyn edik. Kezegim kelip jaqynda jańa salynǵan úıden eki bólmeli páter berildi. Turmysy tómen jandarǵa ylǵı da qoldaý kórsetilip otyrady. Qala ákimdigine alǵysym sheksiz», - deıdi kópbalaly ana Jazıra Sarıeva.
Aıta keteıik, elorda ákimdiginiń bastamasymen Nur-Sultanda sońǵy jarty jyl «Qaıyrymdy ister» uranymen ótip jatyr.
«Igi ister» marafony aıasynda eriktiler, ákimdik qyzmetkerleri, elordalyq Qazaqstan halqy Assambleıasynyń ókilderi, bıznesmender muqtaj azamattarǵa, ıaǵnı kópbalaly, áleýmettik az qamtylǵan jáne erekshe qajettilikteri bar balalardy tárbıelep otyrǵan otbasylarǵa, jalǵyz basty zeınetkerlerge 10 myńnan astam azyq-túlik sebetin taratty.
Olarǵa jan-jaqty kómek pen qoldaý kórsetildi.
Sol sııaqty jaqynda Qurban aıt merekesi kúnderi myńdaǵan otbasyǵa qurbandyq eti úlestirildi.
«Igi ister marafony» respýblıkalyq jobasy aıasynda jyl basynan beri elordada 300-den astam túrli formattaǵy is-shara júzege asyryldy.
Ataýly áleýmettik kómek pen qoldaý 66 myńnan astam adamǵa kórsetildi.