Elordada áleýmettik az qamtylǵan 4 myń otbasyǵa azyq-túlik sebeti tapsyrylady
Nur-Sultanda «Qaıyrymdy ister» marafony aıasynda qasıetti Ramazan aıynda tórt myńnan astam áleýmettik az qamtylǵan otbasyǵa azyq-túlik sebeti tapsyrylady. Azyq-túlik jıyntyqtaryn taratýǵa eriktiler men aınalasyna janashyrlyqpen qaraıtyn qala turǵyndary kómek kórsetip jatyr.
Sonymen qatar, 17 naýryzda «El tiregi – Elbasy» aktsııasy bastaldy. Bul is-sharaǵa «Halyq» qaıyrymdylyq qory bastamashylyq etti. Atalmysh qor Nur-Sultan qalasy boıynsha muqtaj otbasylarǵa 1 000-nan astam azyq-túlik sebetin tapsyrdy.
Óz kezeginde Bolat Ótemuratov qory «El tiregi – Elbasy» aktsııasyn qoldap, sáýir aıynda elordanyń muqtaj otbasylaryna azyq-túlik jıyntyǵynyń 1000 sebetin tabys etti.
Aıta keteıik, bıyl Naýryz merekesi «Qaıyrymdy ister» marafonynyń aıasynda ótti. Naýryz aıynda tórt myń muqtaj otbasyǵa azyq-túlik jıyntyǵy tapsyryldy. Qaıyrymdylyq isti júzege asyrýǵa kásipkerler, iri uıymdar, eriktiler jáne qala turǵyndary atsalysty. Pandemııa kezinde dári-dármekterdi, medıtsınalyq maskalardy taratý, zeınetkerlerdiń aýlalarynyń qaryn kúreý, aǵash otyrǵyzý jáne t.b. jumystar júrgizildi.
Sol sııaqty qasıetti aıdy Nur-Sultan qalasynyń Din isteri jónindegi basqarmasy men dinderdi zertteý ortalyǵy «Nur-Astana» meshiti ujymymen birlesip, aýzy berik musylmandarǵa ystyq tamaq taratýmen bastaǵan.
Esterińizge sala keteıik, Nur-Sultan qalasynyń ákimi Altaı Kólginov bıznesmenderdi, iri kásiporyndardyń basshylary men top-menedjerlerdi qaıyrymdylyq aktsııalaryna qatysýǵa shaqyrdy. Atalǵan is-sharalar aldaǵy ýaqytta da jalǵasatyn bolady.