Elordada aldaǵy 3-5 jylda birneshe kóshe boıyndaǵy úıler súriledi
«Baıqońyr aýdanynyń Kúltegin kóshesinde joǵary voltty elektr berý jelisi ornalasqan. Bul problemanyń sheshilmeı kele jatqanyna 26 jyl boldy. Aýdan turǵyndarymen kezdestik. Úıler kezeń-kezeńimen buzylatyn bolady. Eń aldymen elektr berý jelisi janynda ornalasqan Kúltegin, Asan qaıǵy, Syrdarııa, Lermontov kóshelerindegi úılerge basa mán beriledi. Osyǵan uqsas jumys aldaǵy ýaqytta irgeles aýmaqta da júrgiziledi. Alaıda bul bir kúndik nemese bir jyldyq jumys emes. Ortasha eseppen alǵanda joba 3 jyldan 5 jylǵa deıin sozylady», - dedi elorda ákimi.
Altaı Kólginovtyń málimetinshe, birinshi kezekte jol jáne ınjenerlik jeliler salynýy tıis ýchaskelerdegi úıler súriledi.
«Byltyr elektr berý jelisin shyǵarý boıynsha jobalyq-smetalyq qujattamany daıyndaýdy qolǵa aldyq, qazir ol saraptamadan ótip jatyr. Al bıyl kúzde aýqymdy jobany iske asyrýǵa kirisemiz. Birinshi kezekte, joldardyń jáne ınjenerlik jelilerdiń qurylysy josparlanǵan ýchaskelerdegi úıler, sol sııaqty elektr berý jelisi astyndaǵy úıler buzylady. Buǵan qosa buzylatyn úılerdiń qunyn belgileý, olardy satyp alý jáne buzý jumystary júrgiziledi.
Asan qaıǵy kóshesinde qosymsha elektr qýaty qosylǵannan keıin Kúltegin kóshesindegi elektr jelisi demontajdalady. Bas josparda egjeı-tegjeıli josparlaý jobasyn ázirledik. Jeke sektordyń ornyna áleýmettik nysandar, turǵyn úı kesheni, qoǵamdyq keńistikter boı kóteredi.
Osylaısha, bıyldan bastap Kúltegin, Asan qaıǵy, Syrdarııa jáne t.b. kóshelerdegi úılerdi kezeń-kezeńimen buzýdy bastaımyz», - dep jazdy Altaı Kólginov.
Bas shahardyń ákimi Asan qaıǵy kóshesiniń boıynda 200-den astam úı ornalasqanyn atap ótti. Jospar boıynsha munda, ıaǵnı Ýálıhanov kóshesine parallel segiz jolaqty jol salý qarastyrylyp otyr.
Foto: facebook.com/altay.kulginov.3