Elordada aqyly avtoturaqty kimder tegin paıdalana alady

<p>ASTANA. KAZINFORM &mdash; Astanada aqyly turaq aımaǵynyń shekarasynda turǵyndardyń keıbir sanattary ony tegin paıdalana alady, dep habarlaıdy elorda ákimdiginiń resmı saıty.</p>

Olarǵa mynalar jatady:

- «Altyn qyran» jáne «Halyq qaharmany» ordenderimen marapattalǵan tulǵalarǵa tirkelgen kólik quraldary;

- «Altyn alqa» jáne «Kúmis alqa» alqalarymen marapattalǵan nemese buryn «Batyr ana» ataǵyn alǵan, sondaı-aq I, II jáne III dárejeli «Ana dańqy» ordenderimen marapattalǵan kópbalaly analarǵa tirkelgen kólik quraldary;

- áskerı qyzmetten bosatylǵan nemese áskerı jıyndarǵa shaqyrylǵan, Aýǵanstanda jáne basqa da áskerı is-qımyldar júrgizilgen basqa elderde ınternatsıonaldyq boryshyn oryndaǵan, osy kólik quraldaryn júrgizetin ne osy kólik quraldarynda júrgen azamattarǵa tirkelgen kólik quraldary;

- múgedek balalarǵa, birinshi jáne ekinshi toptaǵy múgedek adamdarǵa, sondaı-aq múgedek balanyń zańdy ókilderine tirkelgen kólik quraldary;

- Semeı ıadrolyq synaq polıgonyndaǵy ıadrolyq synaqtardyń saldarynan zardap shekken adamdarǵa tirkelgen kólik quraldary;

- tıisti taný belgileri, tústi-grafıkalyq boıaýy jáne jazýlary bar shuǵyl jedel qyzmetterdiń (jedel medıtsınalyq kómek, Qazaqstan Respýblıkasy Іshki ister mınıstrligi, Qazaqstan Respýblıkasy Qarýly Kúshteri Áskerı polıtsııasy, Qazaqstan Respýblıkasy Ulttyq qaýipsizdik komıteti) kólik quraldary;

- Uly Otan soǵysyna qatysýshylarǵa, atap aıtqanda, UOS kezeńinde áreket etýshi armııa men flottyń quramyna kirgen áskerı bólimderde, shtabtar men mekemelerde qyzmet ótkergen áskerı qyzmetshilerge, sondaı-aq basqa memleketter aýmaǵyndaǵy áskerı qımyldardyń ardagerlerine jáne jeńildikteri boıynsha Uly Otan soǵysyna qatysýshylarǵa teńestirilgen adamdarǵa tirkelgen kólik quraldary.

Azamattardyń jeńildetilgen sanattary onlaın rejıminde myna silteme boıynsha ótinish bere alady.

Avtoturaq traktorlardy, ózdiginen júretin mashınalardy jáne ólshemderi kommýnaldyq aqyly turaqtardyń turaq oryndarynyń mólsherinen asatyn kólik quraldaryn qospaǵanda, mehanıkalyq kólik quraldaryna resimdeledi.

Ol bir paıdalanýshyǵa eki kólikten artyq emes tirkeledi. Bul járdemaqy usynylǵan medıtsınalyq anyqtamalar boıynsha múgedekterge beriledi.