Elordada «AgriTekAstana 2010» aýyl sharýashylyǵy tehnıkalarynyń kórmesi ashyldy

STANA. Naýryzdyń 17-si. QazAqparat /Marlan Jıembaı/ - Búgin elordada «AgriTekAstana 2010» aýyl sharýashylyǵy tehnıkalarynyń kórmesi ashyldy. Saltanatty shara barysynda quttyqtaý sóz sóılegen Aýyl sharýashylyǵy vıtse-mınıstri Arman Evneev bul kórmeniń Qazaqstannyń aýyl sharýashylyǵy kesheniniń jańa sapaly deńgeıge kóterilgen kezinde ótkizilýi, sondaı-aq agroónerkásiptik keshendi damytýǵa erekshe nazar aýdarǵan Elbasy Nursultan Nazarbaevtyń bıylǵy Joldaýynan keıin ótip otyrǵandyǵy óte ózekti ekendigin basa aıtty.

Ol Memleket basshysy Joldaýynda agroónerkásip keshenin damytý úshin alǵa qoıǵan úsh mindetke keńinen toqtaldy. «Birinshiden 2014 jylǵa qaraı agroónerkásiptik keshende ónimdilikti kem degende eki ese, al 2020 jylǵa qaraı 4 ese arttyrý, ekinshiden eldiń azyq-túlik qaýipsiz­di­gin qamtamasyz etý. Bul oraıda 2014 jylǵa qaraı azyq-túlik taýarlary ishki rynogynyń 80 paıyzdan astamyn otandyq taǵam ónimderi quraýy tıis. Úshinshiden eksporttyq áleýetti iske asyrý degen bolatyn. Bul basym masattardy tek jańa tehnologııalarmen, tehnıkalarmen ǵana júzege asyra alamyz. Demek bul máselelerdiń túıtkilderin sheshý joldary osyndaı kórmeler bolmaq», dedi óz sózinde ol.

Onyń aıtýynsha, mundaı kórmeler jańa tehnologııalarmen jete tanysyp, onyń múmkinshilikterin baǵdarlaýǵa mol múmkindik berýmen qatar, shaǵyn kelisimsharttar jasaýǵa, áriptestik qarym-qatynas ornatýǵa jol ashady.

Naýryzdyń 19-yna deıin jalǵasatyn kórmede Pákistan, Reseı, Kanada, Amerıka syndy álemniń 14 iri memleketiniń 100-den astam aýyl sharýashylyǵy tehnıkalaryn shyǵaratyn kásiporyndary bas qosyp otyr.