Elordada «Ábish álemi» atty shyǵarmashylyq baıqaý ótedi

NUR-SULTAN. QazAqparat – QR Mádenıet jáne sport mınıstrligi, QR Bilim jáne ǵylym mınıstrligi, Nur-Sultan qalasynyń ákimdigi, QR Ulttyq akademııalyq kitaphanasy jáne «Egemen Qazaqstan» gazeti elordada qarasha aıynyń sońynda Ábish Kekilbaıulynyń 80 jasqa tolý mereıtoıyna oraı «Ábish álemi» atty oqý kongresin ótkizbek, dep habarlaıdy QazAqparat uıymdastyrý komıtetine silteme jasap.

Kongress aıasynda «Ábish álemi» shyǵarmashylyq konkýrsy ótedi.

Shyǵarmashylyq konkýrstyń maqsaty: jazýshynyń sanalýan taqyryptaǵy shyǵarmalary men eńbekterin qaıta oqyp, zerdeleı túsý arqyly onyń sanqyrly talantyna taǵzym etý jáne ony álem jurtshylyǵyna tanytý.

Konkýrs myna atalymdar (nomınatsııalar) boıynsha jarııalanady:

«Ábish Kekilbaev – zańǵar jazýshy» (qalamgerlik qyr-syry);

«Ábish Kekilbaev – zamanaýı oıshyl» (fılosofııalyq kózqarasy);

«Ábish Kekilbaev – syrly sýretker» (shyǵarmashylyq sheberligi);

«Ábish Kekilbaev – aıshyqty aqyn» (aqyndyq qoltańbasy);

«Ábish Kekilbaev – taǵlymdy tarıhshy» (shejireshi-tarıhshyldyǵy);

«Ábish Kekilbaev – ǵulama ǵalym» (ǵylymı-zertteýshiligi);

«Ábish Kekilbaev – syndarly synshy» (shynshyl-synshyldyǵy);

«Ábish Kekilbaev – suńǵyla saıasatker» (ishki-syrtqy saıasattyń bilgiri);

«Ábish Kekilbaev – qoǵam qaıratkeri» (áleýmettik-qoǵamdyq qyzmeti);

«Ábish Kekilbaev – ulaǵatty ustaz» (ustaz–shákirt sabaqtastyǵy);

«Ábish Kekilbaev – kemeńger kósemsózshi» (pýblıtsıstik qyzmeti);

«Ábish Kekilbaev – bilikti bilimpaz» (túpsiz tereń bilimdarlyǵy);

«Ábish Kekilbaev – talantty tárjimashy» (telnusqa týyndyger);

«Ábish Kekilbaev – abyz, áýlıe» (bolashaqty boljampazdyǵy);

«Ábish Kekilbaev – patrıot ólketanýshy» (týǵan jer tarıhy);

«Ábish Kekilbaev – etnograf-ǵalym» (turmys-salt zertteýshisi);

«Ábish Kekilbaev – óner zertteýshisi» (ánshilik, kúıshilik óner);

«Ábish Kekilbaev – darhan minezdi daryn» (minezi baı tulǵa);

«Ábish Kekilbaev – asyl azamat» (azamattyq-ustanymdyq qasıetteri);

«Ábish Kekilbaev – úlgili otbasy ıesi» (otbasylyq tálim-tárbıesi).

Konkýrsqa qatysýshylar atalǵan nomınatsııalar boıynsha baıqaýǵa buryn esh jerde jarııalanbaǵan shaǵyn shyǵarmalaryn myna elektrondy poshta arqyly joldaý kerek: e-mail: [e-mail] (estelik, esse, kósemsóz, áńgime, arnaý-óleń, jyr-tolǵaý, retsenzııa, ǵylymı taldaý, syn-maqala, t.b. ) joldaı alady. Belgili bir eńbekten úzindi keltirilgen jaǵdaıda oǵan silteme jasalýǵa tıisti.

Árbir avtor tek bir atalym (nomınatsııa) boıynsha ǵana baıqaýǵa qatysa alady.

Árbir atalym boıynsha qarjylaı syılyqtar jáne arnaıy júldeler taǵaıyndalǵan.

Shyǵarmany 10 qarashaǵa deıin ǵana tapsyrýǵa bolady. Syılyqtar men júldeler Nur-Sultan qalasynda 30 qarashada tapsyrylady.

Jeńimpaz avtorlardyń shyǵarmalary baspadan jeke jınaq bolyp shyǵady.