Elordada Abaı ınteraktıvti kesheniniń tusaýy kesildi

NUR-SULTAN. QazAqparat – Qazaqstan Ulttyq tarıhshylar kongresiniń VIII otyrysynda Abaı ınteraktıvti kesheniniń tusaýy kesildi, dep habarlaıdy QazAqparat tilshisi.

Otyrys barysynda Abaı ınteraktıvti kesheniniń tusaýy kesildi. Keshendi QR Bilim jáne ǵylym mınıstrligi ǵylym komıtetiniń tapsyrysymen L.Gýmılev atyndaǵy Eýrazııa ulttyq ýnıversıtetiniń Abaı akademııasy ǵylymı-zertteý ınstıtýty ázirledi.

«Bul keshen birneshe bólimnen turady. Eń alǵashqy bólim – Abaı tuǵyrnamasy. Aqyn zamandastary men urpaqtarynyń estelikteri, abaıtanýshy ǵalymdardyń akademııalyq zertteýleri osynda tolyǵymen jınaqtalǵan. Ekinshi bólim – Abaıdyń shyǵarmashylyq álemi. Aqyn óleńderi men qara sózderiniń, poemalary men aýdarmalarynyń árqaısy jeke-jeke annotatsııalyq sıpatta taldanǵan jáne ár týyndynyń tolyq mátini aýdıonusqa túrinde berilgen», - deıdi Abaı akademııasy ǵylymı-zertteý ınstıtýtynyń dırektory Erlan Saılaýbaı.

Atalǵan keshende oqyrman Abaı qara sózderiniń shyǵý tarıhymen tanysyp, aýdıonusqada tyńdaı alady.

«Kelesi taraý – beınedárister. Bul taraýda Abaıdyń ómirbaıany men shyǵarmashylyq murasyn jańasha baıandaý maqsatynda tanymdyq akademııalyq dárister toptamasy berilgen. Dáristi abaıtanýshy ǵalymdar oqydy. Sonymen qatar, keshende onlaın kitaphana bar. Onlaın kitaphananyń ereksheligi – aqyn shyǵarmashylyǵy týraly barlyq zertteý, ǵylymı-tanymdyq kitaptar tsıfrlyq formatta tolyq mátinde qoıylǵan. Oqyrman ózi qalaǵan zertteýshisiniń eńbekterin oqyp, tolyq tanysa alady. Keshenniń taǵy bir bóligi – Jıdebaı-Bórili dep atalady. Onda Abaıdyń Jıdebaı-Bórili memlekettik tarıhı-mádenı jáne ádebı-memorıaldyq qoryq-mýzeıiniń quramyna kiretin Semeıdegi bas murajaıy, «Alash arystary – M.Áýezov» murajaıy, Jıdebaıdaǵy Abaıdyń murajaı-úıi, Shákárim murajaıynyń foto-beınenusqalary ornalasqan. Keshenniń taǵy bir mazmundy, maǵynaly bólimi – 20 poezııa bólimi dep atalady. Munda Abaı óleńderi negizinde 15 arnaıy qoıylym túsirilgen. Qoıylymnyń ereksheligi – kásibı akterler Abaı shyǵarmashylyǵynyń mazmunyna sáıkes tamasha qoıylymdar oınap shyqty», - deıdi ol.

Atalǵan shara Ábý Nasyr ál-Farabıdiń 1150 jyldyq, Abaıdyń 175 jyldyq mereıtoıy jáne «Ulyq Ulys» – Altyn Ordanyń 750 jyldyǵyna oraı ótti.