Elordada 85 myńǵa jýyq zeınetkerge áleýmettik kómek kórsetiledi

NUR-SULTAN. QazAqparat - Elordanyń Jumyspen qamtý jáne áleýmettik qorǵaý basqarmasy tarapynan 84 867 zeınetkerge áleýmettik kómek kórsetiledi. Qarttar kúnine oraı 74 145 zeınetkerge jalpy somasy 540 mln teńge kóleminde jyl saıynǵy birjolǵy áleýmettik kómek tólendi, dep habarlaıdy QazAqparat qala ákimdiginiń resmı saıtyna silteme jasap.

Zeınetkerlerge birjolǵy áleýmettik kómek Qazaqstan Respýblıkasynyń Konstıtýtsııa kúnine oraı da berildi. Jasy boıynsha eń tómengi zeınetaqy alýshylarǵa, ıaǵnı 10 722 zeınetkerge 78 mln 195 myń teńge mólsherinde aqsha tólendi.

Al 9 mamyr – Jeńis kúnine oraı 4072 adamǵa jalpy somasy 201 mln 947 myń teńge kóleminde áleýmettik kómek berildi.

Budan bólek 205 zeınetkerge qysta kómir satyp alý úshin 9 mln 516 myń teńge kóleminde qarjylaı kómek kórsetildi.

Turǵyn úıdi gazdandyrý boıynsha gazdandyrýǵa jatatyn jergilikti jeke turǵyn úıde turatyn, jekemenshik ıesiniń otbasy músheleri bolyp sanalatyn zeınetkerlerge, múgedektigi bar tulǵalarǵa, múgedek balalarǵa, kópbalaly analarǵa jáne 83 zeınetkerge birjolǵy kómek berildi, mólsheri – 262 530 teńge (jalpy 21 mln 790 myń tg).

Bıyl 2156 zeınetker Qatarkól shıpajaıynda em aldy. Olarǵa jasyna baılanysty 65-75% jeńildikpen joldama berildi.

Uly Otan soǵysynyń qatysýshylary men múgedekterine monshaǵa, shashtarazǵa, mádenı, oıyn-saýyq jáne sporttyq sharalarǵa barý úshin 21 adamǵa 474 myń teńge kóleminde áleýmettik kómek kórsetildi. Sondaı-aq kommýnaldyq qyzmetterdi tóleý jónindegi áleýmettik kómekpen 21 adam qamtyldy.

Tis emdeý jáne protez salýdan áleýmettik kómekti jyl basynan beri 1140 zeınetker aldy.

Qazirgi ýaqytta «Nur-Sultan qalasy ákimdiginiń «Sharapat» áleýmettik qyzmet kórsetý ortalyǵy 480 adamǵa úıine baryp qyzmet kórsetedi. Onyń 426-sy – jalǵyz turatyn qart, 54 adam – 1 jáne 2 top múgedekteri. Al mekemeniń ózinde 182 qarııa turyp jatyr.
Jahandaný dáýirinde kóptegen qyzmet túri tsıfrly júıege aýysyp jatqany belgili. Sol sebepti aǵa býyn ókilderin tsıfrlyq saýattylyq boıynsha oqytý («Bizben birge» ÚEU, Syǵanaq kóshesi, 29, 1509 kabınet, 87775733591) uıymdastyrylady, tıisinshe qart adamdarǵa qoldaý («Qazaqstan jastar fraktsııasy» QQ, Kenesary kóshesi, 8 úı, 12-qabat, 1712 -kabınet, 8 775 571 33 28) kórsetiledi.

Aıta keteıik, elordada Qarttar kúnin merekeleý aıasynda 20 qyrkúıekten beri ardagerler fleshmoby, zeınetkerler arasynda shahmat pen doıbydan týrnır syndy is-sharalar ótkizildi. «Esil» aýdanynda úılerdi aralap, zeınetkerler men múgedekterdi medıtsınalyq tekserýden ótkizý uıymdastyrylyp jatyr. Sondaı-aq, jalǵyzbasty zeınetkerler men ardagerlerge arnalǵan 40 azyq-túlik sebeti taratyldy. Al bilim berý mekemeleri qarııalardy quttyqtap, qurmet kórsetýde.

Sol sııaqty qalada volonterlerdiń qatysýymen qarttar kúnine oraı kontserttik baǵdarlamalar, qoǵamdyq oryndarda gúlder taratý, qarttar úıinde senbilik, zeınetkerlerge ekskýrsııa ótkizý syndy sharalar 3 qazanǵa deıin jalǵasady.

Qarttar kúnine oraı ótetin is-sharalar sanıtarlyq normalardy tolyqtaı saqtaı otyryp ótedi.