Elordada 6 jyldan beri memlekettik balabaqsha salynbaǵan – Jeńis Qasymbek

<p>Aldaǵy ýaqytta elordada 60-qa jýyq balabaqsha salynady. Bul týraly Astana qalasynyń ákimi Jeńis Qasymbek aıtty, dep habarlaıdy <a href="https://kaz.inform.kz/" target="_blank" rel="noopener">Kazinform.</a></p>

«2017 jyldan beri qalada memlekettik balabaqshalar salynbaǵan. Keler jyly osy baǵdarlamany qaıta bastaýdy josparlap otyrmyz. Osy oraıda 60-qa jýyq balabaqsha paıdalanýǵa beriledi. 11 nysannyń qurylysy 2024 jyly bastalady. Keıbiri bıznespen birlese salynsa, qalǵanynyń qurylysy tek bıýdjet qarajaty esebinen júzege asyrylady», – dedi J. Qasymbek búgin elorda kásipkerlerimen kezdesý kezinde.

Astana basshysy sonymen qatar, balalarǵa arnalǵan oqýshylar saraıyn salý jospary týraly aıtty.

«Mundaı 15 nysannyń qurylysyn josparladyq. Ár aýdanda 5 nysannan salynady. Beseýiniń qurylysyn keler jyly bastaımyz. Ekeýi jergilikti bıýdjet esebinen bolsa, úsheýi memlekettik-jekeshelik seriktestik tártibinde tapsyrylady», – dedi qala ákimi.

Shahar ákiminiń sózine qaraǵanda, keler eki jylda qalada 50 jańa mektep paıdalanýǵa beriledi. Sodan keıin jyl saıyn 10-ǵa jýyq orta bilim ordasy tapsyrylýy tıis.

«Sebebi qaladaǵy tabıǵı ósim men kóshi-qon protsesi aıasynda bul jospardy júzege asyrýymyz kerek», – dedi Jeńis Qasymbek.

Budan buryn qala ákimi áleýmettik ınfraqurylym bala sanyna sáıkes kelmeıtinin aıtqan bolatyn.