Elordada 5500-den astam bos jumys orny bar

ASTANA. QazAqparat – Qazirgi ýaqytta Astanada 5 myńnan astam bos jumys orny bar. Bul týraly Astana qalasy ákimdiginiń «Eńbek mobıldiligi ortalyǵy» mekemesiniń dırektory Oljas Omar málim etti, dep habarlaıdy QazAqparat tilshisi.

«Búginde elordada 5500-den astam bos jumys orny bar. Ortalyqtyń áleýmettik jelilerdegi paraqshasy kún saıyn jańartylyp, sonyń ishinde múmkindigi shekteýli jandar úshin de bos jumys oryndary jarııalanady. Azamattardy jumyspen qamtý aıasynda «Áleýmettik jumys oryndary» baǵdarlamasy boıynsha bir jylǵa jumysqa ornalasýǵa bolady. Jalaqy kólemin jumys berýshi belgileıdi jáne jartylaı «Mansap» ortalyǵy jabady. Qazirgi ýaqytta 300-den astam adam jumyspen qamtyldy», - dedi Oljas Omar qalalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, qalada bos jumys oryndarynyń jármeńkeleri ótedi.

«Bizdiń ortalyq bos jumys oryndary boıynsha jıi jármeńkeler uıymdastyryp turady. Jyl basynan beri 27 ret jármeńke ótti. Bos oryndar jármeńkelerine 50-den astam jumys berýshi qatysady. Eki saǵat ishinde jumyssyz birneshe kompanııany aralap, suhbattasa alady. Kezekti jármeńke elordada 24 tamyzda saǵat 14.30-dan 17.00-ge deıin «Jastar saraıynda» Respýblıka dańǵyly, 34 mekenjaıynda ótedi», - deıdi ol.

Buǵan deıin astanalyq jastarǵa 2,5 paıyzben 5 mln-ǵa deıin nesıe beriletini týraly habarlaǵan edik.