Elordada 5 jyl ishinde 1 myń pedagog daıarlanady - ákimdik

NUR-SULTAN. QazAqparat – Bıyl elordada jańadan 11 mektep salý josparlanǵan. Bul týraly Nur-Sultan qalasy bilim basqarmasynyń basshysy Qasymhan Senǵazıev málim etti, dep habarlaıdy QazAqparat tilshisi.

«2022-2026 oqý jylyna qala ákimdigi joǵary jáne joǵary oqý ornynan keıingi bilimi bar kadrlardy daıarlaý úshin 1 310 bilim grantyn bóledi. Qalalyq bilim basqarmasy pedagogıkalyq mamandyqtarǵa qajettilik boıynsha 1 myń orynǵa ótinim berip otyrmyz. Búginde elordada úsh aýysymda oqytatyn 4 mektep jáne oqýshy sany shamadan tys 15 mektep bar. Osydan 5 jyl buryn qalada 130 542 oqýshy, ıaǵnı 84 memlekettik jáne 11 jeke mektep boldy. Bıyl qaladaǵy oqýshylar sany 215 832-ge jetti. Sol sııaqty qazir qalada 99 jáne 43 jeke mektep bar», - dedi Qasymhan Senǵazıev elorda ákimdiginde ótken qoǵamdyq keńes otyrysynda.

Basqarma basshysynyń málimdeýinshe, bıyl elordada 23 050 oryndyq 11 mekteptiń qurylysy josparlanǵan.

«Jyl saıynǵy oqýshylar kontıngentiniń ósýi men jańa mektepterdiń ashylýyn eskersek, 2025 jylǵa deıin qajettilik 8 160 pedagogty quraıdy. Bul boljam 2025 jylǵa deıin 68 jańa mekteptiń qurylysyn eskere otyryp jasalyp otyr», - deıdi ol.