Elordada 5 myńnan astam turǵyn qar jınaýǵa shyqty

NUR-SULTAN. QazAqparat - Memlekettik mekemelerdiń qyzmetkerleri, stýdentter, kásipkerler, qoǵamdyq uıymdardyń ókilderi, kásiporyndar men PIK qyzmetkerleri qysqy senbilikke qatysty, dep habarlaıdy ákimdiktiń resmı saıty.

«Biz birgemiz» chellendjin elordanyń júzdegen myń turǵyny qoldap, kommýnaldyq qyzmetterge qar qursaýymen kúresýge kómektesýde. Búgin «Biz birgemiz» dep birikken astanalyqtar qar tazalaý boıynsha jalpy qalalyq senbilik uıymdastyrdy. Qala turǵyndary elordanyń aýlalary men trotýarlaryndaǵy qardy tazalap, kommýnaldyq qyzmetterge kómek qolyn sozdy. Qys bastalysymen Nur-Sultanǵa kóp mólsherde qar jaýdy. Búgingi kúnge deıin táýlik boıy jumys istep kele jatqan kommýnaldyq qyzmetterge elordalyq turǵyndar shyǵyp, «Biz birgemiz» aktsııasyn bastaǵan bolatyn. Búgin qalanyń ár bóliginde turǵyndardyń kúshimen 4800 tekshe metrden astam qar jınaldy. Eriktiler, blogerler, qazaqstandyq estrada juldyzdary Rústem Júginisov, Aıgúl Imanbaeva, Tursynbek Qabatov, TerriTima, Álııa Álimjanova, Ádil Ahmetov, Ǵanı Ájikenov sııaqty belsendi qala turǵyndarynyń birlesken kúshimen kómekke muqtaj zeınetkerlerdiń úıiniń aýlalary qardan tazartyldy.

Qazaqstan halqy Assambleıasy etnomádenı birlestikteriniń ókilderi «Óndiris» turǵyn úı alabynda turatyn UOS ardagerleri men qart zeınetkerlerge qar jınaýǵa qol ushyn sozdy. Qar tazalaý jumystary barysynda Sh. Ýálıhanov kóshesinde Bógenbaı Batyr dańǵylynan A. Kravtsov kóshesine deıingi aýmaqta 250 astam «Baıqońyr» aýdany ákimdiginiń qyzmetkeri men JOO jáne kolledj stýdentteri qatysty. Joǵary oqý oryndary men kolledj stýdentteri, bilim berý jáne densaýlyq saqtaý mekemeleriniń qyzmetkerleri óz ǵımarattarynyń aýmaǵyn qardan tazartty. Senbilik is-sharaǵa barlyǵy 475 qyzmet kórsetýshi uıym qatysyp, 978 aýla jınaldy. Elordalyq eriktiler shtabynyń jetekshisi Shyńǵys Tileýlın atap ótkendeı, qysqy merzim ishinde mundaı kómek muqtaj turǵyndarǵa turaqty negizde kórsetiletin bolady. «Sýyq biz úshin qorqynyshty emes. Sondaı - aq ystyq shaı men azyq-túlik sebetterin taratamyz, qar tazalap, astanalyqtardy birlesip ıgi ister jasaýǵa shaqyratyn bolamyz», - dedi ol.

Esterińizge sala keteıik, «Biz birgemiz» chellendji elordalyq turǵyndar arasynda tanymaldylyqqa ıe bolyp, qala turǵyndarynyń kóbi qala aýmaǵyn qardan tazartyp, áleýmettik jelilerde #Bizbirgemiz heshtegimen beıne jáne fotosýretterdi ornalastyrady. Aktsııa jyl basynda bastalǵan bolatyn. Gıdrometeorologııalyq ortalyqtyń málimetteri boıynsha qańtar aıynda Nur-Sultanda rekordtyq jaýyn-shashyn tirkelgen. Sońǵy ret mundaı kórsetkish 1964 jyly belgilendi.