Elordada 5 maýsym kúni aýrýhana patsıentteri qalaı daýys beredi

NUR-SULTAN. QazAqparat – Elordada 5 maýsymda ótetin referendýmda patsıentter daýys berýi úshin medıtsınalyq mekemeler janynan jabyq ýchaskeler uıymdastyrylady, dep habarlaıdy QazAqparat qala ákimdigine silteme jasap.

«Qalalyq jáne ózge de medıtsınalyq uıymdarda emdelip jatqan patsıentterdiń referendýmǵa qatysýy úshin medıtsınalyq mekemeler janynan jabyq ýchaskeler uıymdastyryldy.

Respýblıkalyq mańyzy bar memlekettik mekemeler men medıtsınalyq uıymdardy eskersek, daýys berýge arnalǵan jabyq ýchaskeler sany – 27.

18 jasqa tolǵan patsıentterge, bosanatyn jáne bosanǵan áıelderge daýys berý kezinde tıisti málimetterdi toltyrý úshin ózimen birge jeke kýáligi bolýy jetkilikti.

Jabyq ýchaskelerde saılaý komıssııasy da jumys istep, daýys berýdiń ashyqtyǵyn qadaǵalaıtyn bolady», - delingen málimette.

Qalalyq Densaýlyq saqtaý basqarmasy bas memlekettik sanıtarlyq dárigerdiń qaýlysyna sáıkes aýrýhanalardyń statsıonarlary men akýsherlik bloktarynda karantın rejımi áli de óz kúshinde ekenin atap ótti.