Elordada 480 myń adam tolyq vaktsına aldy

NUR-SULTAN. QazAqparat – Elordada koronavırýstyń taralýy tómendedi. Degenmen indetke qarsy kúreste vaktsına alý jáne revaktsınatsııadan ótý mańyzdy. Bul týraly Nur-Sultan qalasynyń bas memlekettik sanıtar dárigeri Sarqyt Beısenova málim etti, dep habarlaıdy QazAqparat tilshisi.

«Nur-Sultan qalasynda koronavırýstyq ınfektsııanyń tirkelý jaǵdaıynyń tómendeýi baıqalady. Qala 16 aqpannan bastap «sary», al 21 aqpannan bastap «jasyl» aımaq qataryna ótti. Qazirgi ýaqytta (24 aqpanda) aptalyq syrqattanýshylyq kórsetkishi qańtardaǵy (25 qańtarda) eń joǵary aptalyq syrqattanýshylyq kórsetkishimen salystyrǵanda 84,8 esege, ıaǵnı 35 565 jaǵdaıdan 419 jaǵdaıǵa deıin tómendedi», - S. Beısenova elorda ákimdiginde onlaın ótken baspasóz máslıhatynda.

Onyń aıtýynsha, elordada sońǵy aptada koronavırýstyń taralýy tómendegen.

«COVID-19-dan qorǵanýdyń jalǵyz joly – vaktsına alý. Búginde elorda halqynyń 71,5%-y vaktsınanyń birinshi komponentin alsa, 67,3%-y eki komponentti aldy. Naqty sanmen aıtsaq, 509 myńnan astam azamat vaktsınanyń birinshi komponentin aldy jáne 480 myńǵa jýyq azamat ekpe alýdyń tolyq kýrsynan ótti», - deıdi ol.

Sondaı-aq, bas sanıtar dáriger astanalyqtarǵa revaktsına alýdyń mańyzdylyǵyn taǵy bir eskertti.

«Elorda boıynsha 284 814 adamnyń tolyq vaktsına alǵanyna 6 aı ótti. Endi ol azamattar ımmýnıtetin bekite túsý úshin revaktsınatsııadan ótýi qajet. Qazirgi ýaqytta revaktsınatsııa alýy tıis jandardyń úlesi 31,2% -y quraıdy», - dedi bas sanıtar dáriger.