Elordada 3,5 myń adam 42 500 teńge áleýmettik kómek ala bastady
«Memleket basshysynyń daǵdarysqa qarsy qabyldaǵan sharalary bıznesti damytýǵa jáne halyqty jumyspen qamtýǵa qoldaý bolatyndyǵy sózsiz. Jumyspen qamtýdyń jol kartasyna engiziletin jobalar anyqtalyp, olar salalyq mınıstrliktermen kelisildi. Jumyspen qamtýdyń jol kartasyn iske asyrý barysynda ekonomıkanyń naqty sektorynda shamamen 15 myń jumys ornyn qurý josparlanǵan. Jol kartasy aıasynda 16 ońaltý ortalyǵyn salý, mektepter, joldar, ınjenerlik jelileri salý, gazdandyrý, aýla aýmaqtary men qoǵamdyq keńistikti abattandyrý, áleýmettik nysandardy jóndeý jumystary qarastyrylǵan. Atalǵan jobalardy júzege asyrylýy ekonomıkanyń damýyna, azamattardy jumyspen qamtýǵa oń áserin tıgizedi», - dedi qala basshysy.
Onyń atap ótýinshe, qurylys salasy ekonomıka ósiminiń negizgi draıveri biri sanalady.
«Karantın blok-beketterinde azyq-túlik taýarlarynan basqa ınertti jáne basqa da qurylys materıaldary kedergisiz ótkiziledi. Karantın engizilgennen bastap, qalaǵa 5 myń tonnaǵa jýyq qurylys materıaldary jáne 4,5 myń tonna jol jóndeýge arnalǵan materıaldar jetkizildi. Qurylys alańdaryna jumysshylarǵa arnalǵan jataqhanalary bar qurylys kompanııalary óz qyzmetin jalǵastyrýda. Sonymen birge qurylys kompanııalarynyń barlyq basshylaryna sanıtarlyq normalardy qatań saqtaý tapsyryldy. Baqylaýǵa alyndy», - dedi elorda ákimi.
Altaı Kólginovtiń atap ótýinshe, Memleket basshysynyń daǵdarysqa qarsy sharalarynyń aıasynda azamattardy qoldaý boıynsha jumys bastalyp ketti.
«Áleýmettik tólem alýshylar tizimi keńeıtildi. Jumys berýshilerden búgingi tańda 12 myńnan astam ótinim kelip tústi. Onyń 3 500 ótinishi qaralyp, tólem bastaldy. Taǵy 4 myńǵa jyq jumys berýshiler jumyspen qamtý ortalyǵyna júgindi. Barlyq protsester aıtarlyqtaı jeńildetilgen», - dedi ol.