Elordada 24-qabattan sekirmek bolǵan kelinshek qutqaryldy

NUR-SULTAN. QazAqparat – Baıqońyr aýdanynyń ÝPP-27 ýchaskelik polıtsııa ınspektory, polıtsııa kapıtany Qýanysh Mırzaev ózine qol jumsamaqshy bolǵan áıeldi qutqaryp qaldy, dep habarlaıdy QazAqparat Nur-Sultan qalalyq PD baspasóz qyzmetine silteme jasap.

Polıtsııanyń «102» arnasyna Ýálıhanov kóshesiniń boıynda 24-qabattyń erneýinde áıeldiń otyrǵany týraly qońyraý túsken. Oqıǵa ornyna avtopatrýl jiberiledi.

«Osy ýaqytta óziniń ákimshilik ýchaskesinde bolǵan ınspektor Qýanysh Mırzaev oqıǵa týraly estı sala, ýaqyt joǵaltpaı kórsetilgen úıge júgirip baryp, áıeldiń shynynda ólimge qadam jasamaq bolǵanyn kóredi. Sanaýly sekýndta joǵarǵy qabatqa kóterilip, formasyn sheship tastaıdy. Tehnıkalyq qabattyń kishkentaı terezesi arqyly syrtqy erneýge kóteriledi. Aradaǵy qashyqtyq bir metrden astam bolǵan. Bildirtpeı áıeldiń artynan kelip, qolynan myqtap ustap turǵan. Kelinshek qatty jylap, polıtseıden bosap shyǵýǵa tyrysqan. Osy ýaqytta qutqarýshylar da jetedi. Olar birge qyzdy tereze arqyly qaýipsiz jerge alyp shyqty», - delingen baspasóz málimdemesinde.

Al, 27 jastaǵy qala turǵynyn mundaı áreketke ne ıtermelegeni ázirge belgisiz. Polıtsııa onyń mán-jaıyn anyqtaýǵa kiristi.