Elordada 15 myńǵa jýyq bala tegin shyǵarmashylyq úıirmelerge baryp júr

NUR-SULTAN. QazAqparat – Nur-Sultan qalasynda 45 túrli úıirme jumys isteıdi. Jáne oǵan 15 myńǵa jýyq bala tegin qatysyp jatyr. Bul týraly Nur-Sultan qalalyq mádenıet basqarmasy mádenı-kórkem is-sharalardy uıymdastyrý bóliminiń basshysy Saltanat Mýksımova málim etti, dep habarlaıdy QazAqparat tilshisi.

«Memleket basshysy ótken jylǵy joldaýynda balalardy buqaralyq sportqa belsendi tartý, sport sektsııalaryn ashý, balalarǵa arnalǵan úıirmelerdiń jumysyn jandandyrý mindetin qoıǵan edi. Osy oraıda elimizdiń mádenıet týraly zańyna tıisti ózgerister engizilip, Prezıdent tapsyrmasy júzege asyp jatyr. Nur-Sultan qalasynda memlekettik shyǵarmashylyq úıirmelerden bólek, sport sektsııalary da bar. Búginde elordada ýákiletti organdar bekitken 59 shyǵarmashylyq úıirme túri bar. Sonyń 45-i jumys istep tur», - dedi Saltanat Mýksımova elorda ákimdiginde onlaın ótken baspasóz máslıhatynda.

Onyń aıtýynsha, búginde elordada 15 myńǵa jýyq bala shyǵarmashylyq úıirmelerge tegin qatysyp júr.

«Balalar men jasóspirimderge arnalǵan shyǵarmashylyq úıirmeler negizinen Beıbitshilik jáne kelisim saraıy men Táýelsizdik saraıynda uıymdastyrylýda. Balalar úshin esigi árdaıym ashyq. Buryn ata-analar balalaryn úıirmege aqyly qatystyrsa, endigi ýaqytta jergilikti bıýdjetten qarajat bólinip, shyǵarmashylyq úıirmeler men sport sektsııalaryna balalar tegin qatysa alady», - deıdi ol.

Sondaı-aq, spıker balalar men jasóspirimder arasynda buqaralyq sport pen shyǵarmashylyq úıirmeni uıymdastyrý, nasıhattaýǵa quzyrly organ retinde mádenıet jáne sport mınıstrligi jaýapty ekenin eske saldy.