Elordada 13 kúnde salynǵan qalalyq juqpaly aýrýlar ortalyǵy ashyldy
«Bul ortalyq ınfektsııany baqylaý standarttaryna saı keledi. Eń bastysy – bul jerdegi palatalardyń ishindegi aýa eshqashan dáliz jaqqa shyǵyp ketpeıdi. Bul degenimiz – medıtsınalyq qyzmetshiler aýrýdyń aldyn ala alady degendi bildiredi. Ekinshiden, bul ortalyq eki bólikke bólingen. Birinshi bólikte aýrý juqtyrǵan naýqastar jatsa, ekinshi bólikte tek qana dárigerler júredi. Bul da medıtsınalyq qyzmetshiniń aýyryp qalýynan saqtaıdy deýge bolady. Bul jerde az oryndyq palatalar bar, sondaı-aq ortalyq qala syrtynda ornalasqan», - deıdi qalalyq juqpaly aýrýlar ortalyǵynyń dırektory Anna Tsepke.
Ázirge bul jerde koronavırýspen aýyrǵandar emdeledi.
«Bolashaqta juqpaly aýrýǵa shaldyqqan kez kelgen adam osy jerde emdele alatyn bolady. Bul jerde barlyq dıagonostıkalyq, zerthanalyq qurylǵylarmen jabdyqtalǵan, sondyqtan osy jerde dıagnostıka jasaýǵa da, emdeýge de bolady. Bul jerde 362 medıtsınalyq qyzmetshi jumys isteıtin bolady. Bul jerdegi medıtsınalyq qyzmetshiler – Nur-Sultan qalasy jáne respýblıkalyq uıymdardyń mamandary. Koronavırýspen kúreste juqpaly aýrýlarmen aınalysatyn dárigerler ǵana emes, barlyq saladaǵy dárigerler kúsh biriktirdi. Kelesi aptadan bastap koronavırýs juqtyrǵan naýqastardy qabyldaı bastaımyz», - deıdi ol.
Ol bul ortalyqtaǵy negizgi bólim – jansaqtaý bólimi ekenin aıtty.
«Osy ortalyqta 20 oryndyq jansaqtaý bólimi bar. Odan bólek juqpaly aýrýlarǵa arnalǵan bes bólim bar. Bul jerdegi 200 tósek-oryndyń 100-inde jasandy tynys aldyrý qurylǵysy bar. Bizdegi qabyldaý bóliminde qabyldaý bokstary bar. Bul jerde naýqasqa jedel medıtsınalyq qyzmet kórsetiledi. Jansaqtaý bóliminde 20 tósek-oryn jáne osynsha jasandy tynys alý qurylǵysy, basqa da qajetti medıtsınalyq jabdyqtar bar. Bul jerdegi dárigerler jumys istegen jerlerinde uıyqtamaı, qalanyń basqa bóligine baryp demalady. Qala basshylyǵyna, elorda ákimine dárigerlerdiń Hilton qonaq úıine baryp demalýlaryna múmkindik bergenderi úshin alǵys aıtamyz. Ol jerde medıtsınalyq qyzmetkerleriniń tynyǵyp alýyna jaqsy jaǵdaı jasalǵan», - deıdi ol.
Mundaı ortalyq Qazaqstannyń eshbir aımaǵynda buryn-sońdy bolmaǵan. Aldaǵy ýaqytta Almaty men Shymkent qalalarynda salynady. Bul ortalyqty BI GROUP qurylys kompanııasy saldy.
«Bul ortalyq temir betondy modýldi bloktardan salyndy. Ǵımaratty 13 kún ishinde salyp bitirdik. Ortalyqty salý barysynda 1000-ǵa jýyq adam táýlik boıy tynymsyz jumys istedi. Bul jerde jobalaýshylar da, qurylysshylar da úlken eńbek etti. Medıtsınalyq qyzmetshiler qurylys bastalǵaly qasymyzda bolyp, qaı jerde ne bolýy kerek ekeni týraly keńes berip otyrdy, sebebi qurylys jumysy memlekettik satndartqa saı bolýy kerek boldy. Bári olarmen aqyldasyp istelindi», - deıdi joba jetekshisi Aıdan Narymbaev.
Ol qurylys bastalǵan kezde BI GROUP kompanııasynyń seriktesteri shaqyrylǵanyn aıtty.
«Bárimiz bas biriktirip, tatý jumys istedik. Jumys barysynda ózgerister kóp boldy jáne jedel sheshim qabyldaýǵa týra kelip otyrdy. Biraq qandaı másele bolsa da sheshimi bar. Qurylys jumysy qysqa merzimde aıaqtalǵanyna jáne jumysshylardyń kóp bolýyna baılanysty jobanyń quny ózgergen joq. Mysaly, osy ǵımaratty úsh aı salǵanda da qurylysshylar 13 kún ishinde salý barysynda qoldanatyn tamaqty tutynýshy edi. Sondyqtan baǵada aıtarlyqtaı aıyrmashylyq bolǵan joq. Jobanyń jalpy quny – 5,5 mıllıard teńge. Ǵımarattyń kepildik ýaqyty – 2 jyl. Al jalpy qurylysqa qoldanǵan tehnologııa bizdiń esepteýimiz boıynsha kem degende 50 jylǵa jaramdy», - deıdi joba dırektory Arman Lesbaev.