Elordada 107,9 mlrd teńgege qarjylyq buzýshylyqtar anyqtaldy

NUR-SULTAN. QazAqparat – Nur-Sultan qalasynyń máslıhatynda Bıýdjet, ekonomıka, ónerkásip jáne kásipkerlik máseleleri jónindegi turaqty komıssııanyń otyrysy ótti, dep habarlaıdy QazAqparat tilshisi.

Otyrys barysynda elordada 107,9 mlrd teńgege qarjylyq buzýshylyqtar bolǵany anyqtaldy.

«2020 jyly 68 nysanda jalpy qamtý somasy 575,3 mlrd teńgeni quraıtyn 12 aýdıtorlyq sharanyń qorytyndysy shyǵaryldy. Anyqtalǵan qarjylyq buzýshylyqtardyń jalpy somasy 107,9 mlrd teńgeni qurady», - dedi Nur-Sultan qalasy boıynsha Tekserý komıssııasynyń tóraǵasy Imanjúsip Aqpombaev.

Sonymen birge spıker tekserý barysynda qandaı buzýshylyqtar anyqtalǵanyn aıtyp berdi.

«Qarjylyq buzýshylyqtar – 28,5 mlrd teńgeni, bıýdjet qarajaty men aktıvterdi tıimsiz paıdalaný – 27,8 mlrd teńgeni, tıimsiz josparlaý – 51,7 mlrd teńgeni nemese 47,9%-dy quraǵan. Sondaı-aq, rásimdik sıpattaǵy 1 553 jáne júıeli túrde jasalǵan 479 buzýshylyq anyqtaldy», - dep naqtylady Imanjúsil Aqpombaev.