Elordada 1 myń qaýipsizdikti baqylaý kamerasy ornatylady

NUR-SULTAN. QazAqparat - «Qaýipsiz aýla» pılottyq jobasy aıasynda qosymsha beınebaqylaý kamerasyn ornatý bastalady. Aldaǵy ýaqytta qalanyń halyq tyǵyz ornalasqan aýdandarynda 1 myń kamera ornatylady, dep habarlaıdy QazAqparat qala ákimdigine silteme jasap.

Beınebaqylaý kamerasy turǵyn úıler, áleýmettik nysandar jáne saıabaq aımaqtaryna ornatylady. Bul bastama quqyq buzýshylyq pen urlyq sanyn azaıtýǵa baǵyttalǵan.

«Qarqyndy ózgerý kezinde jáne azamattardyń qaýipsizdigi úshin qalada jańa tehnologııalyq sheshim qajet. «Qaýipsiz aýla» pılottyq jobasy – bul bastamanyń alǵashqy qadamy. Kóppáterli úılerdiń aýlasynda abattandyrýdyń buzylýyn jáne qaýipsizdigin qadaǵalaıtyn beınebaqylaý kamerasymen qamtamasyz etý usynylady», delingen habarlamada.

Qazirgi ýaqytta jańa protsess pen quraldar synalyp jatyr. Beınekamera zańsyz áreketti anyqtaý jáne aldyn alý úshin aýladaǵy jaǵdaıǵa úzdiksiz monıtorıng júrgizedi.

Sondaı-aq bıyl jedel járdemniń, órt sóndirýshilerdiń jáne basqa da shuǵyl áreket etý qyzmetterdiń aýla aýmaǵyna kedergisiz ótýi úshin táýliktiń kez kelgen ýaqytynda shlagbaýmdardy avtomatty túrde ashýdy qamtamasyz etýge múmkindik beretin «aqyldy shlagbaým» pılottyq jobasy iske qosyldy.