Elorda jastaryna arnalǵan jańa turǵyn úı baǵdarlamasy qashan iske qosylatyny aıtyldy

NUR-SULTAN. QazAqparat – Jaqynda iske qosylýy múmkin «Elorda jastary» atty jańa turǵyn úı baǵdarlamanyń talaptary qandaı bolady? Bul suraqqa «Otbasy banki» basqarma tóraǵasy Lázzat Ibragımova Facebook-de ótken tikeleı efır barysynda jaýap berdi, dep habarlaıdy QazAqparat.

«Biz qazirgi tańda ákimdikpen birge bul baǵdarlamanyń talaptaryn talqylap jatyrmyz. Ol – «Elorda jastary» baǵdarlamasy dep atalady. Aldyn ala kelisimder bar. Atalmysh baǵdarlama eń aldymen jas otbasylardy qoldaýǵa baǵyttalǵan. Ol jerde de lımıt bekitiledi. 5 paıyzdyq stavka bolsa, bastapqy jarna kólemi shamamen 10 paıyzǵa teń bolýy kerek. Eń birinshi kezekte ol baǵdarlamaǵa astanada eńbek etetin, alaıda kezekke tura almaı júrgen jastardy qosqymyz keledi. Qazirgi tańda baǵdarlamany iske qosýdyń fınaldyq satysynda turmyz. Elorda ákimi Altaı Seıdirulynyń (Kólginov – avt.) ózi de qoldaý bildirýde. Meniń oıymsha, aldaǵy bir jarym aıdyń ishinde biz elorda jastaryna arnalǵan jaǵymdy jańalyqty jarııalaımyz», - dedi Lázzat Ibragımova.