Elorda jastaryn ne mazalaıdy

ASTANA. QazAqparat – Elordada jastardy qoldaý jáne qyzmet kórsetý ortalyqtary bar. Ol jerge jastar ózin tolǵandyrǵan máselelerge jaýap izdep barady. Osy oraıda astana jastaryn kóbine qandaı jaıttar tolǵandyratyny belgili boldy, dep habarlaıdy QazAqparat tilshisi

«Jastarǵa qyzmet kórsetý ortalyqtary 2021 jyldan bastap jumys isteıdi jáne aqparattyq-konsýltatsııalyq kómek beredi. Munda kelýshiler jastardy qoldaýǵa baǵyttalǵan memlekettik baǵdarlamalar týraly aqparat ala alady. Jastar saıasaty máseleleri basqarmasynyń is-sharalarynyń negizgi bóligi Qazaqstan Respýblıkasynyń 2023-2029 jyldarǵa arnalǵan memlekettik jastar saıasaty tujyrymdamasyn iske asyrý jospary sheńberinde ótkiziledi», - dedi Astana qalasy jastar saıasaty máseleleri basqarmasynyń basshysy Qaırat Qambarov qalalyq kommýnıkatsııalar qyzmeti alańynda ótken baspasóz máslıhatynda.

Búginde elordanyń 4 aýdanynda jastarǵa qyzmet kórsetý ortalyqtary jumys istep tur.

«Mamandar memlekettik turǵyn úı baǵdarlamalary, jumysqa ornalastyrý, jastardyń bastamalaryn qoldaý, volonterlik qyzmet, sondaı-aq bos ýaqytty tıimdi ári tegin ótkizý máseleleri boıynsha keńes beredi. Tegin zańgerlik jáne psıhologııalyq kómek kórsetedi. 2022 jyly ortalyqtarǵa 10 myńǵa jýyq jas adam júgindi. Elordalyq jastardy kóbine turǵyn úı alý, sondaı-aq jumysqa ornalasý máseleleri qyzyqtyrady. Ótinishterdiń 90%-y osyǵan baılanysty», - deıdi ol.