«Elorda jastary» baǵdarlamasyna qosymsha qarjy bólý usynyldy

NUR-SULTAN. QazAqparat – Nur-Sultan qalasynyń qoǵamdyq keńes múshelerine astananyń bıylǵa naqtylanǵan bıýdjet jobasyn tanystyrǵan ekonomıka jáne bıýdjettik josparlaý basqarmasynyń basshysy Qaısar Mańqaraev «Elorda jastary» baǵdarlamasyna qosymsha qarjy bólýdi usyndy, dep habarlaıdy QazAqparat tilshisi.

«Turǵyn úı jáne turǵyn úı ınspektsııasy basqarmasyna memlekettik baǵdarlama boıynsha turǵyn úılerdi jylý energeııasymen qamtamasyz etýge, «Elorda jastary» baǵdarlamasy boıynsha jas mamandarǵa jeńildikpen kredıt berýdi jalǵastyrýǵa qosymsha 353,2 mln teńge kózdelip otyr», - dedi ákimdik ókili.

Onyń aıtýynsha, el astanasyn jasyl beldeýmen kómkerý sharalaryna bólinetin qarajattyń kólemin naqtylaý qajet.

«Qorshaǵan ortany qorǵaý jáne tabıǵatty paıdalaný basqarmasyna qorshaǵan ortany qorǵaý jónindegi is-sharalarǵa, kópjyldyq jasyl ekpelerdi kútip ustaýǵa, qalany abattandyrýǵa bıýdjet ákimshiligi baǵdarlamasy arqyly 1 mlrd 600 mln teńge kózdeý usynylyp otyr», - dedi basqarma basshysy.

Sondaı-aq, ol qalanyń ár aýdanyna buryn bekitilgen bıýdjet ústine qosymsha qansha qarajat qarastyrý kerektigin aıtty.

«Almaty aýdany ákiminiń apparatyna kóshelerdi jaryqtandyrýǵa, aýlalardy abattandyrýǵa, qoldanystaǵy aıaldamalarǵa qyzmet kórsetýge jáne qoǵamdyq keńistikti jaıǵastyrýǵa qosymsha 3 mlrd 400 mln teńge qarastyrý usynylyp otyr.

Baıqońyr aýdany ákiminiń apparatyna aýlalardy abattandyrýǵa jáne qoǵamdyq keńistikti jaıǵastyrýǵa qosymsha 1 mlrd 665 mln teńge qarastyrylady.

Esil aýdany ákiminiń apparatyna aýlalardy abattandyrý jáne qoǵamdyq keńistikti jaıǵastyrýǵa 2 mlrd 180 mlrd teńge bólý usynylady.

Saryarqa aýdany ákiminiń apparatyna 2 mlrd 588 mln teńge qarastyrylyp otyr», - dedi Qaısar Mańqaraev.

Onyń sózine qaraǵanda, bul aqsha aýdannyń aryq-naýa júıesin jáne sý ótkizý qubyrlaryn jaryqtandyrýǵa, aýlalardy abattandyrýǵa jáne qoǵamdyq keńistik jaıǵastyrýǵa abǵyttalmaq.