Elorda volonterleri qarttardyń aýladaǵy qaryn kúrep, otynyn jaryp berdi

NUR-SULTAN. QazAqparat - El astanasynda egemendiktiń 30 jyldyǵy aıasynda «30 ıgi is» bastamasy jalǵasýda. Bul joly Nur-Sultan qalasy ákimdigine qarasty «Astana jastary» mekemesi men volonterler muqtaj zeınetkerlerdiń aýlasyn qardan tazartty, dep habarlaıdy QazAqparat.

Elorda ákimdiginen málim etkendeı, jınalǵan bir top qala turǵyny qart kisilerdiń aýladaǵy qaryn shyǵaryp, otynyn jaryp berdi.

«Jasym 77-de. Atamyz 82-ge keldi. Shańyraq kóterip, birge ómir súrip jatqanymyzǵa 57 jyl bolypty. Al bul jerde turyp jatqanymyzǵa 40 jyldan asty. Jastardyń top bolyp biz sııaqty qart kisilerge kómektesip júrgeni qýantady. Byltyr da kelip, biraz sharýamyzdy tyndyryp bergen edi. Bıyl da jalǵasyp jatyr. Alǵysym sheksiz. Densaýlyqtary myqty bolsyn! Bastaǵan árbir isteri berekeli bolsyn dep batamdy beremin», - dep Antonına Tverıtneva alǵysyn jaýdyrdy.

Ájeı bıylǵy qys byltyrǵydaı qarly bolmaǵanyn, sonyń nátıjesinde aýlanyń qaryn tazalaý anaǵurlym jeńil bolǵanyn aıtyp ótti. Alǵysy retinde batasyn berip, kámpıt toly qabyn syıǵa tartty.

«Elimizge úlkenge qurmet, kishige úlgi kórsetetin ónegeli jastar kerek. Qazir volonterlerimiz mundaı ıgi sharalardyń basy-qasynda júrýdi ádetke aınaldyrdy. Qaıyrymdylyq sharasyn ótkizý qajet bolsa, volonterlerimiz judyryqtaı jumylyp, tap-tuınaqtaı oryndap shyǵady. Qalamyzda bas-aıaǵy 3 myńǵa tarta volonterimiz bar. Taza aýada osylaı qar shyǵaryp, otyn jarý densaýlyǵymyzǵa da paıdaly ári saýapty is. Osyndaı kópti kórgen qarııalarymyzǵa qolǵabys etip, batasyn alǵannan artyq baqyt bar ma!?» - dedi Jastar saıasaty máseleleri basqarmasynyń basshysy Qaırat Qambarov.

Volonterler barlyǵy 5 otbasynyń aýlasyndaǵy qaryn shyǵaryp, úlkenderdiń alǵysyna bólendi. Zeınet jasyndaǵy kisiler úshin bul úlken kómek bolǵany belgili.

«Mamandyǵym boıynsha aspaz-kondıtermin. Al volonterlikpen 2018 jyldan aınalysyp kelemin. Osy ýaqyttan beri aptanyń qaı kúni bolsa da qaıyrymdylyq sharalaryna ýaqyt taýyp, bir kisideı atsalysamyn. Memleket basshysy ótken jyldy Volonter jyly dep jarııalaǵannan keıin bul salaǵa qyzyǵýshylyq tanytqandar kúrt artty. Ásirese byltyrdan bastap bul baǵyt erekshe qarqynmen damyp keledi. Úlken kisilerge kómek bergen saıyn erekshe bir sezimge bólenemin. Ol kisilerdiń júzindegi qýanyshty kórip, batalaryn alǵannan keıin kómektesýge degen qulshynysym arta túsedi», - dep jas volonter Adına Amrenova óz áserimen bólisti.