Elorda volonterleri qar kúrep júrgen qyzmetkerlerge ystyq shaı men baýyrsaq taratty

NUR-SULTAN. QazAqparat - Elordalyq volonterler qar kúrep júrgen sanıtarlyq qyzmetkerlerge ystyq shaı men baýyrsaq taratty, dep habarlaıdy QazAqparat qala ákimdiginiń resmı saıtyna silteme jasap.

«Basymyz qosylyp, qala tazalyǵynda júrgen qyzmetkerlerge kómek bolsyn degen nıetpen ystyq shaı men ystyq baýyrsaq taratyp júrmiz. Bul sharanyń bári «Qaıyrymdy ister marafony» aıasynda ótip jatyr», - dedi qalalyq jastar saıasaty basqarmasynyń bólim basshysy Aqulan Tastemir.

Elordalyq volonterler ystyq shaı men baýyrsaq taratyp qana qoımaı, qar kúreý jumysyna da kómek kórsetti.

«Osyndaı qaıyrymdy ispen aınalysyp júrgen jastarǵa kóp rahmet. Aýa raıynyń sýyǵyna qaramaı kóshe tazalap, bes saǵattan beri qar kúredik. Eshqaıda shyǵa almaımyz. Sizderge rahmet, boıymyz jylyp, áldenip qaldyq», - deıdi qar kúrep júrgen qyzmetker Maqsut Kenje.

Sanıtarlyq qyzmetker Yrysty Nyǵymanova jurtshylyqty Naýryz meıramymen quttyqtap ótti.

«Sizderge kópten kóp rahmet. Kelgen Naýryz meıramy qutty bolsyn! Otbasylaryńyzǵa bereke, jumysyńyzǵa tabys tileımin. As taratyp, qurmet kórsetip jatqandaryńyzǵa alǵysym sheksiz», - dedi Yrysty Nyǵymanova.

Aıta keteıik, búgin qala kósheleriniń qaryn kúreýge eki myńǵa jýyq jol jumysshy men 1400-den astam tehnıka jumyldyryldy.

Ótken táýlikte qaladan 100 myń tekshe metrden asa qar shyǵaryldy. Al elordaǵa qar jaýǵaly beri 4 637 884 tekshe metr qar shyǵaryldy.