Elorda turǵyny kóligin satyp, ony jańa ıesinen urlap ketken

NUR-SULTAN. QazAqparat – Elordanyń polıtsııa qyzmetkerleri kólikterge qatysty urlyqtyń aldyn alý maqsatynda jedel is-sharalar ótkizip jatyr, dep habarlaıdy QazAqparat tilshisi.

Máselen, polıtsııaǵa «Kia Rio» markaly kóliktiń ıesi mashınasynyń urlanǵany týraly shaǵymdanǵan. Zardap shegýshiniń aıtýynsha, túnde úıine kelgennen keıin kóligin qulyptap aýlada qaldyrǵan. Al tańerteń kóliginiń urlanǵanyn bilgen.

«Qylmys ornyn tekserý barysynda polıtsııa qyzmetkerleri beınebaqylaý kameralarynyń kómegimen tańǵy saǵat 05:00 shamasynda kólik esigin kiltpen ashyp, aıdap áketken kúdiktini anyqtady. Shyǵyn 2 mln teńgeden asyp jyǵylady. Tergeý amaldary barysynda kólikti aıdap ketken adam anyqtaldy. Ol «Kia Rio» markaly kóliktiń burynǵy ıesi bolyp shyqty. Ol kóligin satý mámilesin jasaǵannan keıin ekinshi kiltti ózinde qaldyrǵan jáne mashınanyń jańa qojaıynynyń mekenjaıyn esinde saqtap qalǵan», - delingen Nur-Sultan qalalyq Polıtsııa departamenti taratqan aqparatta.

Vedomstvo málimetinshe, kúdikti kólikti aıdap ketkennen keıin ony jalǵa alynǵan turaqqa jasyryp, ózi basqa óńirge ketip qalǵan.

«Nur-Sultan qalalyq PD Saryarqa aýdandyq PB krımınaldyq polıtsııa qyzmetkerleriniń tyńǵylyqty izdeý is-sharalarynan keıin kúdikti Qostanaı qalasynda ustaldy. Kóliktiń burynǵy ıesi kinásin moıyndap otyr», - dedi polıtsııadan.