Elorda turǵyndarynyń 82,5 paıyzy MÁMS júıesinde saqtandyrylǵan

NUR-SULTAN. QazAqparat – Astanalyqtardyń 82,5% mindetti áleýmettik-medıtsınalyq saqtandyrý júıesi arqyly saqtandyrylǵan. Bul týraly Áleýmettik-medıtsınalyq saqtandyrý qorynyń Nur-Sultan qalasy boıynsha fılıalynyń dırektory Nurlybek Qabdyqaparov málim etti, dep habarlaıdy QazAqparat tilshisi.

«Bizdiń qor halyqtyń medıtsınalyq saqtandyrý júıesinen tys qalmaýy úshin, halyqty medıtsınalyq kómekpen qamtý jumystaryn odan ári jalǵastyrýda. Qazirgi ýaqytta Nur-Sultan qalasy boıynsha turǵyndardyń 82,5%-y MÁMS júıesinde saqtandyrylǵan. Elorda turǵyndaryna MÁMS júıesinde saqtandyrý mártebesi bolmasa da, tegin kepildendirilgen medıtsınalyq kómek aıasynda shuǵyl medıtsınalyq kómekti, jedel járdem brıgadasyn shaqyrý, ýchaskelik dárigerdiń qabyldaýy sekildi qyzmetterdi tegin ala alatynyn basa aıtqym keledi», - dep atap ótti Nurlybek Qabdyqaparov.

Sondaı-aq, spıker bıyl 6 aı ishinde Nur-Sultan qalasysynda medıtsınalyq saqtandyrý qoryna 19,7 mlrd teńgeden asa jarna aýdarylǵanyn aıtty.

«MÁMS júıesine tólenetin tólemderdiń eń az somasy 12 aıda 25 500 teńgeni (aıyna 2125 teńge) quraıdy. Bul saqtandyrylǵan adamǵa quny birneshe mıllıon teńge turatyn qymbat tekserýler, operatsııalar, EKO qosa alǵanda, TMKKK jáne MÁMS sekildi medıtsınalyq kómektiń aýqymdy tizbesine qol jetkizýge múmkindik beredi», - deıdi ol.

Buǵan deıin fılıal basshysy astanada ambýlatorııalyq medıtsınalyq qyzmetke bólinetin qarajat kóleminiń artatynyn málim etti.

Odan bólek, Nurlybek Qabdyqaparov 150 myńǵa jýyq elorda turǵynynyń tegin dári-dármekpen qamtylǵanyn jetkizdi.