Elorda turǵyndary otandyq QazVac vaktsınasyn belsendi saldyryp jatyr
Mysaly «Abý-Dabı Plaza» saýda oıyn-saýyq ortalyǵynyń vaktsına egý pýnkti 3 bólme jáne kútý zalynan turady. Ekpeni saldyrýǵa kelgen adam eń aldymen dáriger qaraýynan ótedi.
Dáriger patsıenttiń jaǵdaıyn tekserip, densaýlyǵyna qatysty birneshe suraq qoıady. Artynsha tamaǵyn, qan qysymy men dene qyzýyn ólsheıdi. Patsıenttiń hali barlyq parametrge saı kelse vaktsına salatyn bólmege kiredi.
QazVac brendimen shyǵarylatyn QazCovid-In otandyq vaktsınasy Dúnıejúzilik densaýlyq saqtaý uıymynyń tizilimine engizilgen. Ol bıologııalyq qaýipsizdik problemalarynyń ǵylymı-zertteý ınstıtýtynyń bazasynda jasalǵan. Vaktsına koronavırýs ınfektsııasyna qarsy turaqty ımmýnıtetti qalyptastyrady. Onyń qaýipsizdigi men basqa vaktsınalarǵa qaraǵanda artyqshylyǵy dáleldendi. QazVac vaktsınasy assotsıatsııalanǵan aýrýlardy týdyrmaıdy.
Eki komponentti QazVac vaktsınasynyń tıimdiligi klınıkalyq synaqtardan keıin 96%-dy kórsetken.
Densaýlyq saqtaý mınıstriniń málimetinshe, búgingi kúni árbir jıyrmasynshy otandasymyz koronovırýsqa qarsy vaktsına saldyrǵan. Otandyq vaktsınanyń artyqshylyqtarynyń biri saqtaý sharttary. Eger «Sputnik V» vaktsınasy tońazytqyshta -18 gradýs temperatýrada saqtalsa, QazVac vaktsınasy 2-8 gradýs temperatýrada saqtalady.
«Men arnaıy osy qazaqstandyq vaktsınany kútip, búgin saldyrdym. Meniń oıymsha, ǵalymdar, bıologııalyq qaýipsizdik ókilderi QazVac vaktsınasyn óte joǵary deńgeıde jasaǵan. Saldyrǵan soń eshqandaı keri áserin baıqamadym. Densaýlyǵym jaqsy», — dedi astanalyq Aryn Órsarıev.
Búginde elordada 100-ge jýyq egý pýnkti jumys isteıdi. Elordalyqtardy vaktsınalaý úshin barynsha jaǵdaı jasalǵan. Sonymen qatar, «Mega Silk Way», «Kerýen», «Han Shatyr» SOO-larynda egý pýnkteri ashylǵan. Qala turǵyndary qaýipti vırýsqa qarsy vaktsınatsııany belsendi qabyldaýda.
Aıta keteıik, 27 sáýirdegi jaǵdaı boıynsha elordada koronavırýsqa qarsy 95 myńǵa jýyq adam ekpe saldyrǵan. Onyń ishinde qala turǵyndary men qonaqtary, mádenıet jáne óner qaıratkerleri de bar.