Elorda stýdentteri Baýyrjan Momyshuly eskertkishine taǵzym etti
Ekinshi dúnıejúzilik soǵysta qaza tapqan 1 mln. 300 myńnan astam qazaqstandyqty bir mınýt únsizdikpen eske alǵannan keıin stýdentter Baýyrjan Momyshulynyń eskertkishine gúl shoqtaryn qoıdy.
«Biz búgin Uly Jeńistiń 72 jyldyǵyna oraı qazaq jerinen shyqqan uly qolbasshy Baýyrjan Momyshulynyń eskertkishine gúl shoqtaryn qoıý rásimin ótkizip otyrmyz. Ekinshi dúnıejúzilik soǵystaǵy jeńiske Qazaqstan halqynyń qosqan úlesi ushan-teńiz ekendigin bárimiz de bilemiz. Táýelsizdigimizdi alǵannan keıin Halyq Qaharmany ataǵyna ıe bolǵan B.Momyshuly, Q.Qaısenov, H.Dospanova, S.Nurmaǵambetov, surapyl urystardaǵy erligi úshin Keńes Odaǵynyń batyry atanǵan Á.Moldaǵulova, M.Mámetova, T.Bıgeldınov, R.Qoshqarbaev syndy batyrlarymyzdy esh esten shyǵarmaımyz. Olardyń alyp bergen jeńisin keıingi urpaq, ıaǵnı biz joǵary baǵalaımyz. Aspanymyz ashyq bolyp, beıbit ómir súrýimiz úshin qasyq qany qalǵansha jaýmen aıqasyp, uly jeńisti keıingi urpaqqa amanat etken barlyq soǵys ardagerlerine shynaıy alǵysymyzdy bildiremiz», - dedi Qazaq memlekettik zań ýnıversıtetiniń stýdenti Ǵalymjan Nııazov.
Sonymen qatar qazaqstandyq jastardyń boıyndaǵy otansúıgishtik qasıetti damytyp, eli men jerine degen súıispenshilikti oıatý úshin búgingideı sharalardyń jıi ótkizilip turýy qajet ekendigin basa aıtty.