Elorda statsıonarlarynan bir kúnde 300-den astam adam emdelip shyqty
Búgin qalalyq statsıonarlardan 305 astam adam emdelip shyqty. Olardyń kóbi pnevmonııa men koronavırýs ınfektsııasyna shaldyqqan egde jastaǵy adamdar. Nur-Sultan qalasynyń turǵyny Birjan Abdýllın búgin aýrýhanadan shyqqandardyń biri.
«Eldi aýrý syrqaýdan arashalap qalyp jatqan Qazaqstannyń densaýlyq saqtaý qyzmetkerlerine myń alǵys! Respýblıka dańǵylynda ornalasqan emdeý ortalyǵyna ókpeniń qabynýy boıynsha em alýǵa kelgenmin. Qatty aýyryp kelip edim, qazir úıge oralǵaly turmyn. Qýanyshta shek joq, myń alǵys», – deıdi aqsaqal. Nur-Sultan qalasynyń turǵyny Petr Vasılev eki jaqty ókpe qabynýymen aýrýhanaǵa jatqyzylǵan.
«Dárigerlerge, barlyq medıtsına qyzmetkerlerine kásibı biliktiligi úshin úlken rahmet! On tórt kúnde meni aıaǵyma turǵyzdy. Bári jaqsy, qazir ózimdi jaqsy sezinemin!» – deıdi zeınetker. Qazaqstan astanasynda COVID-19 jáne pnevmonııany emdeý boıynsha oń nátıje baıqalady. Nur-Sultan qalasy ákimdigi koronavırýs ınfektsııasymen jáne pnevmonııamen kúres boıynsha pármendi sharalar qabyldaýda. Bul shildeniń basynan bastap aýrýhanalarǵa túsken naýqastar sanynyń tómendeýinen baıqalady. 5 shildeden bastap qabyldanǵan karantın sharalary men ambýlatorııalyq emdeýdi kúsheıtýden keıin statsıonarlardaǵy pnevmonııamen aýyratyn naýqastardyń sany 1348-den 633 adamǵa deıin (eki eseden astam) azaıdy.
Jedel járdem stantsııasyna shaqyrtýlar sany táýligine 3 myńnan 1100-ge deıin úsh ese qysqardy. Nur-Sultandaǵy koronavırýs ınfektsııasynan emdelip shyqqandar sany 70% – 10 320 naýqastyń 7 260-y saýyǵyp shyqty. Tósek-oryn qorynyń júktemesi 99%-dan 38%-ǵa deıin azaıdy. COVID-19 ınfektsııasynyń oń dınamıkasyn saqtaý úshin, barlyq qala turǵyndary qatań sanıtarııa normalaryn: maska taǵyp, qashyqtyq saqtaýy qajet.