Elorda saıabaǵynda Konstıtýtsııa kúni atalyp ótti
Іs-sharaǵa Qazaqstan halqy Assambleıasy Tóraǵasynyń orynbasary Janseıit Túımebaev, QHA músheleri men qoǵam qaıratkerleri, QHA etnomádenı birlestikteri men jastar qanatynyń ókilderi jáne qala turǵyndary men qonaqtary qatysty.
Kontserttiń ashylýynda sóz sóılegen J.Túımebaev barsha qazaqstandyqtardy kele jatqan memlekettik mereke – Qazaqstan Respýblıkasynyń Konstıtýtsııasy kúnimen quttyqtaı otyryp: «Tuńǵysh Prezıdentimiz – Elbasy Nursultan Ábishuly Nazarbaevtyń jáne jańa Prezıdentimiz Qasym-Jomart Kemeluly Toqaevtyń turaqty kepili men qajymas eńbekteriniń arqasynda Konstıtýtsııamyz táýelsiz elimizdiń quqyqtyq júıesiniń ózegine, damýymyzdyń berik irgetasyna aınaldy. Búgin biz quqyqtyq, damyǵan memleket qurý jolyn elimizdiń basty zańynyń talaptaryna sáıkes jańa deńgeıge kóterýdemiz. Ata zańymyzdyń arqasynda qazaqstandyqtar mádenı jáne rýhanı qundylyqtardy qaıta órkendetýdiń jańa múmkindikterine ıe boldy. Konstıtýtsııamyzdyń jalpyulttyq qundylyqtardy qurmetteý normalaryn júzege asyrý arqasynda kópetnosty Qazaqstanda barlyq azamattardyń kelisimi men birliginiń irgetasy qalandy», - dep atap ótti.
Jınalǵan qaýym Qazaqstan halqy Assambleıasy etnomádenı birlestikteriniń shyǵarmashylyq toptary men aspaptyq mýzyka, án-bı ujymdarynyń qoıylymdaryn tamashalady.