Elorda polıtsııasy júrgizýshilerge qolaısyz aýa raıyna baılanysty saq bolýdy eskertti

NUR-SULTAN. QazAqparat – Nur-Sultan qalasynyń polıtsııa departamenti qardyń tolassyz jaýýyna baılanysty kólik ıelerine úndeý joldady, dep habarlaıdy QazAqparat tilshisi.

Departamenttiń baspasóz qyzmeti taratqan málimet boıynsha, ótken táýlikte elorda aýmaǵynda 53 jol-kólik oqıǵasy tirkelip, eki adam zardap shekken.

«Júrgizýshilerden jol boıynda kólik qoımaý kerektigin, sol arqyly qoǵamdyq kóliktiń qozǵalysy men qar kúreıtin tehnıkasynyń jumysyna kedergi keltirmeý qajettigin eskertemiz. Qar kúreý jumystary táýlik boıy uıymdastyrylyp jatyr. Jol qozǵalysy erejelerin, jyldamdyq rejımin jáne qaýipsiz ara qashyqty qatań saqtańyzdar», - dep jazylǵan polıtsııanyń úndeýinde.

Saqshylar, júrgizýshilerge baratyn baǵytyn aldyn ala josparlap, kenet baqsa jolaqqa aýyspaýdy jáne tejegishti kenet baspaýdy, qala syrtyna sapardan bas tartýǵa keńes beredi.

«Jaıaý júrginshilerge óte muqııat bolý kerek. Joldan ótken kezde gadjetke úńilmeı, qulaqqapty sheship, jaqyndap kele jatqan kóliktiń joqtyǵyna kóz jetkizý kerek.

Qolaısyz aýa raıynda saqtyq sharalary jol-kólik oqıǵalarynyń sanyn edáýir azaıtýǵa kómektesedi. Sondaı-aq, turǵyn úı keshenderine qyzmet kórsetetin kompanııalardyń ókilderi aýladaǵy qardy ýaqytyly tazalaýdy uıymdastyrýy qajet.

Tártip saqshylary jol-kólik oqıǵalaryna jol bermeý úshin barlyq qajetti sharalardy qabyldaıdy, qıyn jaǵdaıǵa tap bolǵan júrgizýshilerge barynsha kómektesedi, sondaı-aq qoǵamdyq tártip pen qala turǵyndarynyń qaýipsizdigin qamtamasyz etedi», - delingen úndeýde.