Elorda polıtsııasy jastardyń karantın kezinde qalaı demalyp júrgenin kórsetti

NUR-SULTAN. QazAqparat – Elordanyń sanıtarlyq-epıdemıologııalyq qadaǵalaý basqarmasy, ákimdik qyzmetkerleri, eriktiler men polıtseılerden qurylǵan monıtorıng toptary karantın rejımin buzý faktilerin anyqtaý boıynsha reıd sharalaryn jalǵastyryp keledi, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Qala turǵyndary birqatar eskertý sharalary kórsetilgen qoldanystaǵy Qaýly talaptaryn elemeı, áli de kópshilik jınalatyn kóńil kóterý oryndaryna baryp júr.

Táýlik ishinde monıtorıng júrgizý toby kásipkerliktiń 74 nysanyn tekserip, karantın rejımin buzýdyń 28 faktisin anyqtaǵan. Tártip buzǵan 130-dan astam adam polıtsııa bólimine jetkizildi.

Osylaısha, saǵat 01.00-de mobıldik top «Mıllıoner» meıramhanasynda tártip buzý faktisin anyqtady. Mekemeniń ishinde 50-den astam adam júrgen. Jas adamdar onda tyǵyz aralasyp, kóńil kóterip, maska taǵý jáne áleýmettik qashyqtyqty múldem saqtamaǵan.

Sondaı-aq saǵat 00:32-de jumys kestesin saqtamaı qyzmet atqarǵan «Tekıla» barynda tártip buzý faktisi anyqtaldy. Mekeme ákimshiligi sanıtarlyq talaptardy saqtamaı, 50-den astam adamǵa qyzmet kórsetti.

Budan basqa, saǵat 02:55-te «Zoloto» meıramhanasynan tártip buzý faktisi anyqtaldy. Munda 70-ten astam adam kóńil kóterip júrdi.

22 tamyz kúngi tańǵy saǵat 05:15-te mobıldik top «Alanııa» karaoke-barynda karantın talaptaryn buzý faktisin tirkegen. Túni boıy jumys istegen mekemede 50-den astam adam júrgen.

Sondaı-aq, demalys kúnderi qalada adamdardyń kóp sanyn jınaǵan eki úılený toıy ótken. «Forte-fortýna» meıramhanasynda toıǵa 85 adam, al «Tartýga» dámhanasynda 115 adam kóńil kóterip júrdi.

Keıbir mekemelerdiń qyzmeti sot sheshimen toqtatylǵanyna qaramastan, ıeleri sanıtarlyq dárigerdiń Qaýlysynyń talaptaryn qaıta buzyp keldi.

Mekeme ıelerine qatysty jınalǵan materıal QR Ákimshilik quqyqbuzýshylyqtar týraly kodekstiń 425-baby boıynsha ákimshilik jaýapqa tartý úshin ókiletti organǵa jiberildi.

Nur-Sultan qalasynyń polıtsııa departamenti tártip buzýshylardyń aǵymdaǵy zańnamaǵa sáıkes jaýapqa tartylatynyn eskertedi.