Elorda polıtsııasy qalada bolǵan mıtıngke qatysty jaǵdaıdy túsindirdi

ASTANA. QazAqparat – Astana qalasynyń polıtsııasy, 26 qarsha kúni eloradada bolǵan mıtıngke qatysty jaǵdaıdy túsindirdi, dep habarlaıdy QazAqparat Polisia.kz saıtyna silteme jasap.

26 qarasha kúni keshkisin Astanadaǵy túngi klýbtardyń birinde jastarǵa arnalǵan mádenı-buqaralyq is-shara uıymdastyryldy. Uıymdastyrýshy kásipker sharaǵa 300-ge jýyq jastardy jınaǵan.

Jıyn barysynda uıymdastyrýshy jınalǵandarǵa kórineý jalǵan aqparat berip, beıbit jınalystar ótkizýdiń zańda belgilengen tártibin buza otyryp, olardy zańsyz sherýge shaqyrǵan. Arandatý nátıjesinde qoǵamdyq tártip óreskel buzylyp, kólik jáne áleýmettik ınfraqurylymnyń tolyqqandy jumys isteýine kedergi keltirilgen.

Jıynǵa qatysýshylar polıtsııanyń zańsyz áreketti toqtatý týraly talabyn eskermeı, daýys kúsheıtkishti qoldanǵan, uıymdastyrýshynyń shaqyrýymen tártipti buzýdy jalǵastyra bergen.

Qala turǵyndarynyń qaýipsizdigin qamtamasyz etý maqsatynda polıtsııa zańsyz áreketterdiń jolyn kesý sharalaryn qabyldaýǵa májbúr boldy. Bul rette zańsyz sherýge qatysýshylar qyzmetkerlerge baǵynbaı, qarsylyq kórsetti.

«Qazirgi ýaqytta kináli adamdar anyqtalyp, polıtsııaǵa jetkizildi. Olardyń is-áreketterine belgilengen tártippen quqyqtyq baǵa beriledi»,-delingen habarlamada.