Elorda polıtsııasy ınternet arqyly jasalatyn taǵy bir qylmysty áshkereledi

NUR-SULTAN. QazAqparat – Elordanyń polıtsııa qyzmetkerleri Instagram áleýmettik jelisinde jalǵan akkaýnt quryp, onda áıelderge arnalǵan kıim satamyn dep adamdardy aldaǵan 31 jastaǵy áıeldi ustady.

Bul týraly QazAqparat Nur-Sultan qalasynyń Polıtsııa departamentine silteme jasap habarlaıdy.

Alaıaq áıel jelidegi paraqshasyna túrli kıimderdiń sýretteri men olarǵa jeńildikter týraly aqparat ornalastyratyn bolǵan. Óziniń «taýaryna» qyzyǵýshylyq tanytqan adamdarmen messendjer arqyly baılanysqa shyqqan ol alatyn zaty úshin turǵyndardyń bank kartochkasyna aldyn al tólem jasaýyn talap etken.

Alaıaq áıeldiń bul áreketinen Nur-Sultan qalasynyń 41 jastaǵy turǵyny zardap shekti. Ol «satýshynyń» kartochkasyna 83 250 teńge kólemindegi aqshasyn aýdarǵan. Aqshany alǵan «saýdager» akkaýntyn buǵattap, uıaly telefonyn óshirip tastaǵan.

Qazirgi kezde ustalǵan áıelge qatysty QR Qylmystyq kodeksiniń 190-babymen (alaıaqtyq) sot aldyndaǵy tergeý amaldary júrgizilip jatyr.

«Internette jeńildikteri bar ádemi kıimder men zattar týraly akkaýnttar adamdardy qyzyqtyrmaı qoımaıtyny belgili. Olardyń kóbi taýardyń bar-joǵyna kóz jetkizbesten, elektrondyq ámııanǵa aldyn ala tólem jasaıdy»,-deıdi baspasóz qyzmetinen.

Osy rette olar ınternet-saýda jasaý barysynda alaıaqtardyń áreketterinen saqtaný úshin este ustaý qajet birneshe máseleni atady:

- Satýshynyń telefon nómiri men mekenjaıynyń jazylmaýy;

- Satýshymen baılanys tek telefon arqyly ǵana júrgiziledi;

- Taýardyń baǵasy basqa satýshylardyń osyndaı taýarǵa usynyp otyrǵan baǵasymen salystyrǵanda tym tómen.

«Nur-Sultan qalasynyń polıtsııasy túrǵyndardy Internet arqyly taýar satyp alý kezinde qyraǵylyq tanytýǵa shaqyrady. Eger siz ınternet-alaıaqtardyń áreketterinen zardap shekken bolsańyz, myna telefon nómirlerine habarlasýyńyz qajet: 71-67-10, 71-66-10, 71-65-58, nemese 102»,-delingen habarlamada.